Ҳасанбой Дўсматов Олимпиада финалига чиқди

Бу унинг фаолиятида Олимпиадалардаги иккинчи финал.

Фото: Миллий олимпия қўмитаси

Ёзги Олимпия ўйинлари бокс мусобақасида ўзбекистонлик боксчилардан Ҳасанбой Дўсматов яримфинал баҳсларини бошлаб берди.

-51 кг вазнда Рио Олимпиадаси чемпиони ҳисобланган Дўсматов Кабо-Верде вакили Даниэл Де Пинага қарши жанг қилди ва уч раундда ҳам ҳакамлар устунликни унга беришди (5:0).

Шу тариқа, у ўз фаолиятида иккинчи марта Олимпиада финалига йўлланма олди ва энди 9 август куни франциялик Билол Беннамага қарши олтин учун жанг қилади.

Ҳасанбой Дўсматов Париждаги турнирни пуэрто-рикалик Лопез де Жесус Ҳуанмага қарши жангда ғалаба қозониш билан бошлаган, чоракфиналдаги оғир жангда эса қозоғистонлик Сакен Бибоссиновни 3:2 ҳисобида мағлубиятга учратганди.

Маълумот учун, бунгача ўзбекистонликлардан Абдумалик Халоков (-57 кг ), Асадхўжа Мўйдинхўжаев (-71 кг), Лазизбек Мулложонов (-92 кг) ва Баҳодир Жалолов (+92 кг) ҳам яримфинал масаласини ижобий ҳал қилишганди. Лазизбек Муллажонов тез орада тожикистонлик рақиби билан финал йўлланмаси учун кураш олиб боради.