Россия ҳудудларида - дронларнинг янги ҳужумлари

Россиядан ҳимояланаётган Украина билан чегара яқинидаги Россия ҳудудлари яна учувчисиз ҳаво воситалари ҳужумига учради. Ўтган кечада Белгород вилоятида учта, Курск вилоятида тўртта, Воронеж вилоятида иккита ва Ростов вилоятида иккита учувчисиз учиш аппарати уриб туширилган, дейилади Россия Мудофаа вазирлиги 7 август, чоршанба куни эрталаб эълон қилган баёнотда.

Ўз навбатида, Курск вилояти губернатори вазифасини бажарувчи Алексей Смирнов уриб туширилган учта Украина самолёти типидаги учувчисиз учоқлари ҳақида маълум қилди. У одамларни дрон парчалари топилса, унга яқинлашмасликка чақирди. Бундан ташқари, Смирнов эрталаб икки марта минтақада ракета хавфи борлигини эълон қилди, шунингдек, жанглардан жабрланган аҳолига қон топширишга чақирди. Кечаси у Украинанинг иккита ракетаси уриб туширилгани ҳақида хабар берди. 

Губернаторлар турар жой биноларига етказилган зарар ҳақида гапирди

Белгород вилояти губернатори Вячеслав Гладков Украина Қуролли кучларининг Шебекино шаҳрига уюштирган ҳужуми ҳақида гапирди. «Икки учувчисиз учоқ турар жой биносига ҳужум қилди, иккинчи дроннинг ҳужуми натижасида ўша хонадонда ёнғин содир бўлди», — деб ёзди у. Кейинчалик Гладков аҳолидан ҳеч ким жабрланмаганини, иккита кўп қаватли уй ва битта тижорат мулкида зарар аниқланганини, Новая Таволжанка қишлоғида эса хусусий уй зарар кўрганини айтди. 

Бундан ташқари, Гладков Шебекинский округидаги электр таъминотида фавқулодда узилишлар юз бергани, бир қатор аҳоли пунктларида электр таъминотини тиклаш бўйича ишлар ҳақида маълум қилди. «Шебекино шаҳри, Чураево ва Крапивное қишлоқлари ҳамон қисман электр таъминотисиз қолмоқда», — деди у. Белгород губернатори ҳам 7 август куни эрталаб яна ракета таҳдидини эълон қилди.

Воронеж вилояти губернатори Александр Гусев дрон ҳужуми натижасида Воронеждаги иккита кўп қаватли уйга зарар етганини маълум қилди. «Дастлабки маълумотларга кўра, ҳалок бўлганлар йўқ», - дея ёзди у ва минтақада янги дрон ҳужумлари хавфи ҳақида огоҳлантирди. Ростов вилояти губернатори Василий Голубев «минтақанинг шимолий қисмида иккита учувчисиз учоқ уриб туширилгани» ҳақида маълум қилди. «Дастлабки маълумотларга кўра, парчаларнинг қулаши натижасида ҳеч ким жабрланмаган», — деди у. 

Украинадан Курск вилоятига бостириб киришга уриниш

Сешанба куни аввалига Курск вилояти расмийлари, кейинроқ эса Россия Мудофаа вазирлиги Украинадан Россия чегарасини бузиб ўтишга уриниш ҳақида эълон қилган эди. Ҳарбий департамент маълумотларига кўра, эрталаб Украина Қуролли кучларининг 300 га яқин аскари, 11 та танк ва 20 та зирҳли техникаси Николаево-Дарино ва Олешня ҳудудларида россиялик чегарачиларга ҳужум қилган. 

Белгороднинг «Пепел» нашри хабарига кўра, Украина Қуролли кучлари камида олти нафар россиялик ҳарбийни асирга олган. Украина Telegram-каналлари уларнинг баъзилари билан видеоларни тарқатди. Айтилишича, асирлар орасида муддатли ҳарбий хизматга чақирилганлар ҳам бор. Россия Мудофаа вазирлигининг маълум қилишича, захира кучлар минтақага юборилган.