Қозоғистон ва Ўзбекистон ўртасида 15 та ҳужжат имзоланди

Ўзбекистон президенти Шавкат Мирзиёевнинг Қозоғистонга давлат ташрифи доирасида 15 та ҳужжат имзоланди.

Kazinform хабарига кўра, Қозоғистон президенти Қосим-Жўмарт Тўқаев ва Шавкат Мирзиёев қуйидаги ҳужжатларни имзолади:

1. Қозоғистон Республикаси президенти ва Ўзбекистон Республикаси президентининг қўшма баёноти;

2. Қозоғистон Республикаси ва Ўзбекистон Республикаси Олий давлатлараро кенгашининг Қозоғистон-Ўзбекистон икки томонлама ҳамкорлигини янада ривожлантириш тўғрисидаги қарори;

3. Қозоғистон Республикаси ва Ўзбекистон Республикаси Олий Давлатлараро кенгашининг Ташқи ишлар вазирлари кенгаши тўғрисидаги низомни тасдиқлаш тўғрисидаги қарори.

Бундан ташқари, Ўзбекистон президентининг Қозоғистонга давлат ташрифи доирасида қуйидаги ҳужжатлар имзоланди:

1. Қозоғистон Республикаси ҳукумати ва Ўзбекистон Республикаси ҳукумати ўртасида Қозоғистон-Ўзбекистон давлат чегараси режими тўғрисидаги битим;

2. Қозоғистон Республикаси ҳукумати билан Ўзбекистон Республикаси ҳукумати ўртасида 2006 йил 4 сентябрдаги Қозоғистон-Ўзбекистон давлат чегараси орқали ўтказиш пунктлари тўғрисидаги битим баённомасига ўзгартириш ва қўшимчалар киритиш тўғрисидаги баённома;

3. Қозоғистон Республикаси ҳукумати ва Ўзбекистон Республикаси ҳукумати ўртасида 2006 йил 20 мартдаги халқаро автомобил қатнови тўғрисидаги битимга ўзгартириш ва қўшимчалар киритиш тўғрисидаги баённома;

4. Қозоғистон Республикаси ҳукумати ва Ўзбекистон Республикаси ҳукумати ўртасида маданий-гуманитар ҳамкорлик бўйича 2024-2025 йилларга мўлжалланган чора-тадбирлар режаси;

5. Қозоғистон Республикаси Қишлоқ хўжалиги вазирлиги ва Ўзбекистон Республикаси Қишлоқ хўжалиги вазирлиги ўртасида қишлоқ хўжалиги соҳасида ҳамкорлик тўғрисидаги битим;

6. Қозоғистон Республикаси Миллий иқтисодиёт вазирлиги ва Ўзбекистон Республикаси Иқтисодиёт ва молия вазирлиги ўртасида ўзаро англашув ва ҳамкорлик тўғрисидаги баённома;

7. Қозоғистон Республикаси Миллий иқтисодиёт вазирлигининг Табиий монополияларни тартибга солиш қўмитаси ва Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси ўртасида табиий монополияларни тартибга солиш соҳасидаги ҳамкорлик тўғрисидаги баённома;

8. Қозоғистон Республикаси Соғлиқни сақлаш вазирлиги ва Ўзбекистон Республикаси Соғлиқни сақлаш вазирлиги ўртасида соғлиқни сақлаш соҳасида ҳамкорлик тўғрисидаги битим;

9. Қозоғистон Республикаси Рақобатни ҳимоя қилиш ва ривожлантириш агентлиги ва Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси ўртасида рақобатни ҳимоя қилиш сиёсати соҳасида ҳамкорлик тўғрисидаги баённома;

10. Қозоғистон Республикаси президенти ҳузуридаги Қозоғистон Стратегик тадқиқотлар институти ва Ўзбекистон Республикаси президенти ҳузуридаги Стратегик ва минтақалараро тадқиқотлар институти ўртасида Қозоғистон-Ўзбекистон эксперт кенгашини ташкил этиш тўғрисида ўзаро англашув меморандуми;

11. Қозоғистоннинг «Отандастар» жамғармаси ва Ўзбекистон Республикаси Маданият вазирлиги ҳузуридаги Халқаро муносабатлар ва хорижий давлатлар билан дўстлик алоқалари қўмитаси ўртасида ўзаро англашув тўғрисидаги битим;

12. Астана шаҳри ҳокимлиги ва Тошкент шаҳри ҳокимлиги ўртасида 2025-2026 йилларга мўлжалланган савдо-иқтисодий, сармоявий ва маданий-гуманитар соҳаларда ҳамкорликни кенгайтириш бўйича аниқ чора-тадбирлар режаси («Йўл харитаси»).