Украина ҳарбийлари Россиянинг 74 та аҳоли пунктини назорат қилмоқда – Зеленский

Украина раҳбари босиб олинган ҳудудларда «гуманитар ечимларни ишлаб чиқиш» давом этаётганини маълум қилди.

Фото: Reuters

Россиядаги 74 та аҳоли пункти Украина ҳарбийлари назоратида, деб хабар берди Украина президенти Володимир Зеленский.

«Мураккаб, шиддатли жангларга қарамай, бизнинг кучларимиз Курск вилоятида олдинга силжишда давом этмоқда ва «алмашув фондимиз» ўсиб боряпти», деди Зеленский.

Украина президентининг сўзларига кўра, босиб олинган ҳудудларда «гуманитар ечимларни ишлаб чиқиш давом этмоқда». У аҳоли пунктларида қанча тинч аҳоли қолганига аниқлик киритмади.

Курск вилояти губернатори вазифасини бажарувчи Алексей Смирнов 12 август куни президент Владимир Путин билан учрашувда Украина қуролли кучлари 28 та аҳоли пунктини эгаллаб олганини айтди. Кейинроқ Россия Мудофаа вазирлиги Украина қўшинларининг минтақада бошқа олдинга силжиш имконияти йўқлигини даъво қилди.