Ўзбекистонлик ҳайдовчи Toyota автомобилларини ҳожатхона қоғозига ўраб божхонадан ўтказмоқчи бўлди

Беларус-Литва чегарасида ҳожатхона қоғозига ўралган учта Toyota Land Cruiser автомобили аниқланди.

Фото: Media-Polesye.com

Ўзбекистон фуқароси ҳожатхона қоғозига яшириб қўйилган учта Toyota Land Cruiser автомобилини Беларусга олиб киришга уринди. У Литва божхоначилари томонидан тўхтатилди, деб хабар берди Media-Polesye.

Қайд қилинишича, MAN юк машинаси «Медининкай» назорат пунктига 10 август куни эрталаб етиб борган. Ҳайдовчи Ўзбекистон фуқароси 720 кг ҳожатхона қоғозини олиб кетаётганини маълум қилган. Божхоначилар юк машинасини рентгенга жўнатган. Маълум бўлишича, учта Toyota Land Cruiser йўлтанламас автомобиллари ярим тиркама ичида бир неча қават ҳожатхона қоғози орқасига яширилган. Ҳайдовчи топилмадан ҳайратда қолиб, бундай юк ҳақида ҳеч нарса билмаслигини айтган.

Умумий қиймати 87 минг евро бўлган автомобиллар божхоначилар томонидан хатланган. Ҳайдовчи гаров эвазига қўйиб юборилгани таъкидланмоқда.