Германиянинг Россиядаги элчиси: Москва ҳозир музокарага тайёр эмас

Россия Украина билан тинчлик музокараларини бошлашга тайёрлигини намойиш этмаяпти, деди тахминан бир йил аввал Германиянинг Москвадаги элчиси этиб тайинланган Александр Ламбсдорфф General-Anzeiger газетасига берган интервюсида. У билан суҳбат матни 16 август, жума куни чоп этилган.

«Айни пайтда Россия томони музокаралар олиб боришга тайёр эмас. Аксинча, у ортиқча дастлабки шартларни талаб қилмоқда. Президент (Путин) Украина билан у Россия аллақачон аннексия қилган барча ҳудудлар, жумладан, Украинанинг Россия ҳарбий жиҳатдан назорат қилмайдиган қисмларидан бутунлай чиқиб кетган тақдирдагина гаплашишга тайёрлигини билдирганди. Бу мутлақо жиддий эмас», — деди дипломат.

Айни пайтда, Ламбсдорфф фикрича, Москванинг позицияси келажакда ўзгариши мумкин, бу эса ўт очишни тўхтатиш бўйича музокараларни амалга оширишга имкон беради. «Охир-оқибат, бир кун келиб Россия бу уруш билан дастлаб режалаштирганидан анча кам ютуқларга эришаётганини, халқаро миқёсда ўзига катта зарар етказаётганини ва қаттиқ қизиб кетган уруш иқтисодиётида яшаётганини тан олиши керак бўлади. Бу узоқ давом эта олмайди», - дейди у. 

Тинчлик музокаралари учун эҳтимолий каналлар

Россия томони музокарага тайёр бўлиши биланоқ, улар учун мос каналлар топилади, деб ишонади немис дипломати. Шу муносабат билан у Москва ва Киев ўртасида алоқа ўрнатишга ёрдам бера оладиган учинчи давлатларнинг ролини тилга олди. «Туркия ғалла битимини тузишда катта ёрдам берди, Бирлашган Араб Амирликлари ва Қатар ҳам Хитой билан биргаликда олти бандлик режани тақдим этдилар», деди Александр Ламбсдорфф. 

Украина Қуролли кучларининг Курск вилоятидаги ҳужумини шарҳлар экан, Ламбсдорфф шундай деди: «Украина кучларининг бундай операцияни амалга оширишга муваффақ бўлганлиги разведка, ҳарбий, фуқаролик мудофааси кучлари ва Россия аҳолиси учун ёқимсиз кутилмаган ҳодиса бўлди». 

Сўнгги воқеаларни ҳисобга олиб, Москванинг Украинада ядро қуролидан фойдаланиш эҳтимоли ошганига ишонасизми, деган саволга жавоб берар экан, дипломат Хитойнинг ядро қуролидан фойдаланишни қабул қилиб бўлмайди, деган баёнотини эслади. «Хитойсиз Россия урушни давом эттира олмайди», - дея хулоса қилди Германиянинг Россия Федерациясидаги элчиси.