Хитой Путиннинг ташрифидан кейин Россиядан нефт сотиб олишни 30 фоизга қисқартирди

Россия нефт компаниялари асосий харидори — Хитойдан ўз баррелларига бўлган талабнинг кескин камайишига дуч келмоқда. Июл охирларига кўра, Россиядан Хитойга нефт етказиб бериш 7,4 фоизга тушиб кетган. Хитой божхона статистикасига кўра, суткасига 1,76 миллион баррел ҳажмдаги нефтнинг етказиб берилиши — камида ўтган йилнинг охиридан бери энг паст кўрсаткич ҳисобланади.

Хитой импортининг қисқариши биринчи чорак охирларида бошланди ва май ойида Россия президенти Владимир Путин Пекинга ташриф буюрганидан кейин янада тезлашди. Мартда нефтчилар Хитойга кунига 2,55 миллион баррел сотган бўлса, июнга келиб бу кўрсаткич суткасига 2,05 миллион баррелни, июлда эса 1,9 миллионни ташкил этган. Шундай қилиб тўрт ойда Хитойга нефт етказиб бериш 30 фоизга, йил бошидан бери 22 фоизга тушиб кетди (декабрда суткалик кўрсаткич 2,25 миллион баррел эди).

Reuters’нинг ёзишича, Хитой нефтни қайта ишлаш заводлари Россия нефтини Яқин Шарқники билан алмаштирмоқда: июл ойида Саудия Арабистонидан импорт 13 фоизга, кунига 1,51 миллион баррелгача ошган. Бундан ташқари, Малайзиядан импорт қилинаётган нефт ҳажми ҳам кескин ошиб кетган — суткасига 1,46 миллион баррел (61 фоиз).

Хитой ҳамон Россия нефтининг асосий харидори бўлиб қолмоқда — мамлакатдаги нефтнинг 43 фоизини сотиб олади. Россия Хитойга етказиб берадиган барача товарларнинг учдан икки қисмини нефт, 90 фоиздан кўпроғини эса хом ашё ташкил қилади.

Хитой талабининг пасайиши иқтисодий даромадни камайтирди: июл ойида у кунига 656 миллион еврогача тушиб кетди. Нефт экспортидан келадиган даромад июнга нисбатан 5 фоизга (кунига 219 миллион евро) камайган.

Reuters агентлигининг қайд этишича, Хитойнинг июл ойида жами нефт импорти 2022 йил сентябр ойидан бери энг паст кўрсаткич бўлган. «Кескин пасайиш саноат ва қурилишдаги фаолликнинг сустлиги билан боғлиқ», — дейди Economist Intelligence таҳлилчиси Мэтю Шервуд.