Эронда Раисий вертолёти ҳалокатига юклама ва об-ҳаво сабаб бўлгани рад қилинди

Эроннинг собиқ президенти Иброҳим Раисий вертолёти ҳалокатига ҳаддан ташқари юклама ва ёмон об-ҳаво сабаб бўлмаган. Бу ҳақда Mehr агентлиги Эрон Қуролли Кучлари Бош штабининг авиаҳалокатларни суриштирувини назорат қилувчи алоқа марказига таяниб хабар берди.

Алоқа марказининг таъкидлашича, Fars ахборот агентлиги томонидан шу мазмунда тарқатилган хабар ёлғон. Марказ оммавий ахборот воситаларини мудофаа ва хавфсизлик масалалари билан боғлиқ маълумотларни ўзи билан мувофиқлаштиришга чақирди.

Аввалроқ, Fars ахборот агентлиги Раисий учган вертолёт бортида хавфсизлик протоколларида рухсат этилганидан икки киши кўпроқ бўлганини маълум қилган эди. Шу сабабли, учувчи туманни пайқаб, вертолётни керакли баландликка олиб чиқмоқчи бўлганида, машина етарли қувватга эга бўлмаган ва туман туфайли кўриш чекланган шароитда тоғга қулаган.

Эрон Бош штаби вертолёт ҳалокати сабабларини ўрганиш бўйича дастлабки ҳисоботида йўловчилар ва жиҳозлар сони, юк ташишнинг максимал оғирлиги бўйича вертолёт сиғимига боғлиқ қоидалар бузилиши аниқланмаганини қайд этган. Бош штабнинг фалокатни ўрганиш бўйича комиссияси аварияга олиб келиши мумкин бўлган техник нуқсонларни аниқламаган. Комиссиянинг иккинчи ҳисоботида об-ҳаво шароити парвоз учун қулай деб топилгани алоҳида таъкидланган.

19 май куни Иброҳим Раисий ва Эрон ташқи ишлар вазири Ҳусайн Амир Абдуллоҳиён бўлган вертолёт Шарқий Озарбайжон провинцияси шимоли-ғарбидаги тоғга қулади. Вертолёт бортидаги 8 кишининг барчаси ҳалок бўлди.