Тошкентда дарахт кесган фуқаро 17 млн сўм жарима тўлайдиган ва 100 та кўчат экадиган бўлди

Экология вазирлиги хабарига кўра, Тошкент шаҳар Экология, атроф-муҳитни муҳофаза қилиш ва иқлим ўзгариши бошқармасига Сергели тумани, Сергели 7-мавзесида дарахтга шикаст етказилаётгани ҳақида мурожаат келиб тушди.

Мурожаат жойига чиқиб ўрганилганида “Мададкор” МФЙда фуқаро Й.У. томонидан 1 та дарахт кесилиб, ўсишдан тўхташ даражасида шикаст етказилгани маълум бўлди. Натижада табиатга 8 миллион 840 минг сўм зарар етказилган.

Ҳуқуқбузарга нисбатан Маъмурий жавобгарлик тўғрисидаги кодекснинг 79-моддаси 1-қисми билан маъмурий баённома расмийлаштирилди. Унга базавий ҳисоблаш миқдорининг 25 баравари — 8 миллион 500 минг сўм жарима белгиланди. Ҳуқуқбузар жами 17 миллион 340 минг сўм товон тўлайдиган бўлди. 

Шунингдек, унга Вазирлар Маҳкамасининг 464-сон қарорига асосан кесилган дарахт учун компенсация тарзида 100 туп кўчат экиш мажбурияти юклатилди.