Зеленский: Россия ноябрда бўлиб ўтадиган янги тинчлик саммитига таклиф қилинади

Украина президенти ноябр ойида навбатдаги Глобал тинчлик саммитини ўтказиш ниятида, у ерда урушни тугатиш бўйича ўз қарашларини баён қилади. Россия ҳам учрашувга таклиф қилинади. Зеленский Жо Байден билан ҳам учрашув ўтказишини билдирди.

Фото: Reuters

2024 йилнинг ноябрига мўлжалланган навбатдаги Глобал тинчлик саммити ташкилотчилари Россияни таклиф қилмоқчи. Бу ҳақда Украина президенти Володимир Зеленскийнинг 13 сентябр, жума куни Киевдаги матбуот анжуманида маълум қилгани ҳақида Франциянинг Le Monde газетаси хабар берди. Бундан ташқари, йиллик «Ялта Европа стратегияси» йиғилиши олдидан бўлиб ўтган матбуот анжуманида Зеленский сентябр ойида АҚШ президенти Жо Байден билан Россия бошлаган урушни тугатиш бўйича «ғалаба режаси»ни тақдим этиш учун янги учрашув ўтказишини эълон қилди.

Нашрнинг қайд этишича, Зеленский ҳеч қандай тафсилотларни келтирмаган. Украина президенти сўзларига кўра, унинг таклифи «Украинага урушни тинчликка йўналтириш учун етарли куч берадиган ўзаро боғлиқ ечимлар тизимини» ўз ичига олади, деб ёзади газета.

Киев АҚШдаги сайловлар олдидан яна тинчлик саммити ўтказмоқчи

Июл ойи бошида Bloomberg агентлиги Украина 2024 йил ноябрига режалаштирилган АҚШ президентлик сайловлари олдидан Россия билан ҳарбий можарони адолатли, тинч йўл билан ҳал этишга эришиш учун янги конференция ўтказишга ва Россия Федерациясини учрашувга таклиф қилишга интилаётгани ҳақида хабар берди.

Украина расмийларининг Америка сайловлари олдидан учрашув ўтказиш нияти, агар сайловларда ғалаба қозонса, «Украинадаги урушни тўхтатиши» билан мақтанган «Доналд Трампнинг Оқ уйга қайтиши истиқболи» билан боғлиқ.

РФ ТИВ: Россия тинчлик саммитларида қатнашмоқчи эмас

«Россия Украина тинчлик саммитлари каби тадбирларда иштирок этиш ниятида эмас», деди Россия ташқи ишлар вазири ўринбосари Михаил Галузин 11 июл куни «РИА Новости» агентлигига. У буни потенциал учрашувнинг мазмуни «жуда аниқ» экани, унда Украина тинчлик формуласи илгари сурилиши ва бошқа ташаббуслар «эътиборсиз қолдирилиши» билан изоҳлади.

Биринчи Глобал тинчлик саммити жорий йилнинг июн ойида Швейцарияда бўлиб ўтди ва унда 90 дан ортиқ давлат вакиллари қатнашди. Россия таклиф этилмади, бир қанча давлатлар қуйи даражадаги делегацияларни юборди ва Киевнинг глобал жанубдаги муҳим давлатларни ўз томонига тортишга уриниши муваффақиятсизликка учради, чунки баъзилари якуний баёнотни имзолашдан бош тортди.