Россияда «русофобия» учун хорижликларга нисбатан жазо чоралари жорий этилади

Жиноят кодексига Россия Федерациясидан ташқарида чет элликлар томонидан россияликларга нисбатан камситувчи ҳаракатлар учун модда киритилади. Россия ҳукумати тегишли қонун лойиҳасини қўллаб-қувватлади.

Фото: Shutterstock

Россия ҳукумати чет элликларга «русофобия» учун жазо жорий этишни маъқуллади. Вазирлар маҳкамаси хориждагилар учун «русофобия» бўйича жиноий жавобгарликни жорий этиш тўғрисидаги қонун лойиҳасига расмий жавобнинг ижобий лойиҳасини тайёрлади, деб хабар қилди 23 сентябр, душанба куни «Интерфакс» агентлиги тегишли ҳужжатга таяниб.

Россия Федерацияси Жиноят кодексига янги 136.1-«русофобия» моддасини киритиш режалаштирилмоқда. Биринчи қисм чет элликлар (шу жумладан мансабдор шахслар) томонидан Россия Федерациясидан ташқарида Россия фуқаросига, шунингдек, мамлакатда доимий яшовчи фуқаролиги бўлмаган шахсга ёки Россия фуқароси бўлмаган ватандошга нисбатан содир этилган камситиш ҳаракатлари учун жавобгарликни назарда тутади. Иккинчи қисм — бундай ҳаракатларни содир этишга оммавий чақириқлар учун.

Ҳукумат мазкур моддада назарда тутилган муайян лавозимларни эгаллаш ёки муайян фаолият билан шуғулланиш ҳуқуқидан маҳрум қилиш тарзидаги жазога доир мулоҳазалар инобатга олинган ҳолда қонун лойиҳасини маъқуллади. Вазирлар маҳкамаси жиноят предметининг ўзига хос хусусиятларини инобатга олган ҳолда мазкур қоидани амалда қўллашда қийинчиликлар юзага келиши мумкин, деб ҳисоблайди.

РФдан ташқарида жойлашган шахслар учун жазолар

Жиноят кодексининг 12-моддаси 3-қисми - «Россиядан ташқарида жиноят содир этган шахсларга нисбатан жиноят қонунчилигининг ҳаракати»га ҳам ўзгартиришлар киритиш режалаштирилган. Бундан буён у Россияда доимий истиқомат қилмайдиган, Россия фуқаролиги бўлмаган хорижликлар ва фуқаролиги бўлмаган шахсларга нисбатан қўлланади.

Жиноят-процессуал кодексининг 247-моддаси 5-қисми - «Судланувчининг иштироки»га ўзгартириш киритилди, унга кўра айрим ҳолларда бир қатор кичик ва ўрта оғирликдаги жиноятлар бўйича жиноий ишлар судланувчисиз ўтказилиши мумкин (ҳозир бу фақат оғир ва ўта оғир жиноятларга тегишли).

Қонун лойиҳаси муаллифлари - вице-спикер, «Ягона Россия»дан депутат Ирина Яровая ва унинг партиядоши, Думанинг хавфсизлик ва коррупцияга қарши кураш қўмитаси раиси Василий Пискарев.