Германияда хитойлик аёл жосусликда гумонланиб қўлга олинди

Германия федерал прокуратураси 1 октябр куни Лейпцигда ХХР махсус хизматларига ишлашда гумонланган хитойлик Яци С.ни қўлга олди.

Тергов маълумотларига кўра, Яци С. Лейпциг-Галле аэропортида фаолият юритадиган логистика компанияси ходими бўлган ва маълумотларни Цзяню Г.га — «Германия учун муқобил» партиясидан Европа парламенти депутати Максимилиан Кранинг собиқ ёрдамчисига бериб келган.

Аёл томонидан етказиб келинган маълумотлар ҳарбий техникаларни ташиш ва немис мудофаа компаниясига боғлиқ одамларнинг парвозларига боғлиқ бўлган. Прокуратура батафсил маълумотларни ошкор этмади.

Яци С. тергов судига олиб борилган бўлиб, у ерда хитойлик аёл ҳибсга олиш ордери билан таништирилган ва уни тергов қамоқхонасига жойлаштириш бўйича кўрсатма берган. Яци С.нинг иш жойида тинтув ўтказилган.

Цзяню Г. Апрел охирида Дрезденда қўлга олинган эди. Унинг турар жойи ҳам тинтув қилинган. Германия бош прокурорининг маълум қилишича, евродепутат Кранинг собиқ ёрдамчиси «Хитой махсус хизматининг ходими» ҳисобланади ва жорий йилнинг январида у «резведка органларидаги ўз буюртмачисига Европа парламентининг музокаралари ва қарорларига оид маълумотларни топширган». Бундан ташқари, у разведка хизматининг топшириғига кўра, Германиядаги Хитой мухолифатлари вакилларини кузатиш билан ҳам шуғулланган.

Хавфсизлик органлари Цзяню Г.нинг ҳаракатлари тўғрисида маълумот олган ва бир йилдан ортиқ вақт давомида уни кузатган. Қўлга киритилган маълумотларнинг бирида келтирилишича, у 20 йилдан бери Хитой разведка хизматининг ходими эканини айтган. Бошқа бир хабарда бўлса, ўзининг евродепутатига жами 50 минг евро берганини қайд этган. Терговнинг тахминича, пуллар парламентарий ёрдамчисининг шахсий активларидан эмас, балки Хитой разведкасида келган.

Максимилиан Кра ўз ёрдамчисининг бундай хатти-ҳаракатларидан бехабар эканини билдирган. «Германия учун муқобил» евродепутатига қарши дастлабки тергов ҳаракатлари олиб борилмоқда.