Билл Гейтс сунъий интеллект олдидаги учта асосий қўрқувини айтди

Microsoft асосчиси Билл Гейтс янги интервюсида сунъий интеллектнинг (СИ) ривожланиши билан боғлиқ асосий қўрқувлари билан ўртоқлашди. Тадбиркор сунъий интеллектнинг порлоқ келажагига ишонса-да, эътиборга муҳтож бўлган учта асосий муаммони аниқлади. Бу ҳақда Business Insider хабар берди.

Биринчидан, у «ёмон ниятли одамлар сунъий интеллектни кибержиноят, биотерроризм ва уруш учун ишлатишидан» хавотирда. Унинг сўзларига кўра, жиноятчиларга қаршилик кўрсата оладиган ва бир қадам олдинда бўладиган сунъий интеллектни яратиш керак.

Иккинчидан, Гейтс сунъий интеллектнинг меҳнат бозорига таъсиридан хавотирда. Агар яхши ўргатилса, тиббий СИ воситалари аниқ ташхис қўйиш, шунингдек, савдо менежерлари, техник ёрдамчи ва бошқа мутахассисларнинг одатдаги вазифаларини бажариши мумкин. Шу билан бирга, Гейтс СИ мутахассисларнинг иш юкини енгиллаштириши, натижада иш ҳафтасининг қисқаришига олиб келиши мумкин бўлса-да, бундай тезкор ўзгаришлар хавотирга сабаб бўлишини тан олди.

Учинчидан, тадбиркор СИ устидан назоратни йўқотиш билан боғлиқ бошқа мутахассисларнинг хавотирлари билан ўртоқлашди. Бу, айниқса, бир нуқтада инсон ақл-заковатидан ошиб кетадиган ва одамларни йўқ қилишга қодир бўлган умумий СИ ривожланиши ғоясига тўғри келади.

Шу билан бирга, тадбиркор, масалан, СИ билан боғлиқ энергия истеъмолининг ўсишидан хавотирда эмас. У келажакда СИ бу муаммони ҳал қилиш йўлларини топишига ишонч билдирди.

Гейтс СИ кундалик ҳаётига фаол интеграциялашаётганини айтди. Мисол учун, у иштирок этган йиғилишларни сарҳисоб қилиш учун. У аввалроқ матн ёзиш ва учрашувларни режалаштиришда ChatGPT хизматидан фойдаланишини тан олган эди.