6 минг сохта iPhone билан Apple компаниясини чув туширган фирибгарлар жазоланди

АҚШ Адлия вазирлиги қалбаки iPhone смартфонлари билан боғлиқ жуда катта фирибгарликни амалга оширган икки шахсга нисбатан ҳукмни эълон қилди.

Қайд қилинишича, 34 ёшли тенгдошлар Ҳаотян Сун ва Пенгфэй Сюэ Apple компаниясини алдаб, 6 мингга яқин қалбаки смартфонларни аслига алмаштириб, 2,5 миллион долларга яқин даромад олган. Уларнинг жиноий фаолияти 2017 йилдан 2019 йилгача давом этган ва оқибатда компания жиддий молиявий йўқотишларга дуч келган.

3 октябр куни эълон қилинган ҳукмга кўра, Сун 57 ойлик қамоқ жазосига ҳукм қилинди ва Apple компаниясига 1 миллион доллардан ортиқ товон тўлаши керак. Унинг шериги Сюэ 54 ойлик қамоқ жазосини олди ва 397 минг долларга яқин пулни қайтариши шарт. Иккаласи ҳам қамоқдан кейинги уч йилни назорат остида ўтказиши ва ҳукмнинг бир қисми сифатида қўшимча пул тўлаши керак.

Фирибгарлик серия рақамлари ўзгартирилган ёки кафолат остидаги ҳақиқий смартфонларга мос келадиган IMEI кодларига эга қалбаки iPhone смартфонлари билан боғлиқ. Apple янги қурилмаларга бир йиллик кафолат беради ва бу кафолатни узайтириш учун суғурта режаларини таклиф қилади, бундан тажовузкорлар фойдаланган. Фирибгарлар Apple хизмат кўрсатиш марказларига қалбаки смартфонларни почта орқали жўнатган ёки сохта маълумотлардан фойдаланган ҳолда шахсан олиб келишган. Оқибатда, Apple ушбу қурилмаларни ҳақиқий ва кафолатли деб ҳисоблаб, кўпинча уларни аслларига алмаштириб берган.

Жиноий схема Apple хавфсизлиги ва терговчиларнинг биргаликдаги саъй-ҳаракатлари туфайли фош этилди. 2019 йилда почта инспектори Стивен Коэн Хитойдан келаётган минглаб қалбаки iPhone солинган пакетларни аниқлаган, сўнгра Apple компаниясига топширган. Ушбу қурилмалар кафолат муддати тугаган ёки қалбаки қисмларга эга эди, бироқ Apple уларни ҳақиқий деб қабул қилган.

Таъкидланишича, Apple компанияси смартфонларни қайтариб топширишдаги фирибгарликка қарши чораларни кўрган. Бироқ, фирибгарлар турли тахаллуслар ёрдамида ва янги почта қутиларини очиш орқали бу чораларни осонгина четлаб ўтган. Мисол учун, Сун саккизта UPS Store почта қутиларидан фойдаланган.

Федерал агентлар пакетларни аниқлаб, барча смартфонларнинг IMEI кодларини ёзиб олиб, қўшимча маълумот тўплаш учун уларни олувчиларга етказишга рухсат берган. Кейин терговчилар ушбу рақамлар билан боғлиқ маълумотларни олиш учун Apple билан боғланган. Маълум бўлишича, Сун бир нечта электрон почта манзилларидан фойдаланган ҳолда таъмирлаш бўйича 1 мингдан ортиқ сўровлар юборган, улардан баъзилари ўз номига рўйхатдан ўтган.

Тергов бир неча ой давом этди, агентлар нафақат пакетларни аниқлашди, балки гумондорларни кузатиб боришди, уларнинг фаолиятини таҳлил қилишди ва ҳатто далилларни топиш учун уйлари яқинидаги ахлат қутиларини текширишди. Apple шунингдек, сохта IMEI кодлари ва серия рақамларини, шунингдек, қурилмаларда қалбаки қисмлар мавжудлигини тасдиқлаш орқали терговга ёрдам берди. Натижада жиноий схема муваффақиятли фош этилиб, фирибгарлар жазога тортилди.