Италияда эрта қариш синдромига чалинган 28 ёшли эркак вафот этди

Прогерия — эрта қариш синдромига чалинган ва энг узоқ умр кўрган италиялик Семми Бассо 28 ёшида вафот этди. Бу ҳақда Бассо ҳамда унинг ота-онаси ташкил этган ушбу касалликка қарши курашиш ассоциацияси хабар берди.

«5 октябр куни Семми Бассо ўзи яхши кўрган инсонлар қуршовида байрамни нишонлаганидан кейин кутилмаганда вафот этди», — дейилади ташкилотнинг Facebookʼдаги саҳифасида эълон қилинган хабарда.

Бассо 1995 йилда Италиянинг Скио шаҳрида дунёга келган. Икки ёшида унга Хатчинсон-Гилдорд — прогериянинг болаларда учрайдиган шакли ташхиси қўйилган. Касаллик борасида етарлича маълумот йўқлиги сабаб Бассонинг ота-онаси унга қарши курашувчи ассоциация — l’Associazione Italiana Progeria Sammy Basso'га асос солган.

Семми Бассо унинг Чикагодан Лос-Анжелесга US 66 шоссеси бўйлаб саёҳати ҳақида National Geographic томонидан суратга олинган ҳужжатли фильмдан кейин машҳурликка эришди. Шунингдек, у ўз касаллиги ҳақида маълумот бериш мақсадида телевидениеда чиқишлар қилиб, интервьюлар бериб келарди.

2018 йилда Бассо «табиий фанлар» мутахассислиги бўйича Падова университетини тамомлади. У ген инженерияси ёрдамида прогерияни даволаш имкониятларига бағишланган диссертацияни ҳимоя қилган. Орадан бир йил ўтиб, Бассонинг аортал клапани алмаштирилган — бу прогерияга чалинган беморда ўтказилган шу турдаги биринчи операциядир. Шундан кейин у «Италия Республикаси олдидаги хизматлари учун» мамлакатнинг олий ордени кавалерига айланди.

Хатчинсон-Гилфорд прогерияси кам учрайдиган генетик касаллик бўлиб, ҳар 20 миллион кишининг бирида учрайди. Ҳозирда дунёда ушбу синдром аниқланган 130 та ҳолат қайд этилган, улардан тўрттаси — Италияда.

Прогерияда тери ва ички аъзолар ўзгаради, шунинг учун беморлар ёшига нисбатан каттароқ кўринади. Касаллик оқибатида ҳаёт сифати ҳам пасаяди. Бундай касалликка чалинганлар даволашсиз тахминан 13 йил яшайди.