Мадуро Илон Маскни Венесуэлада давлат тўнтаришига уринишда айблади

Америкалик бизнесмен Илон Маск жорий йилнинг июлида Венесуэлада ўтказилган президентлик сайловларидан кейин давлат тўнтаришига уриниш учун камида 1 миллиард доллар сарфлаган. Бу ҳақда республика президенти Николас Мадуро Venezolana de Television телеканали эфирида маълум қилди.

Венесуэла етакчисининг сўзларига кўра, ажратилган маблағлар мухолиф етакчи Мария Корина Мачадо томонидан тақсимланган. У ўз навбатида, террорчилик гуруҳларини молиялаштириш билан шуғулланган.

«Маск мағлубиятга учради», — дейди Мадуро. Венесуэла президентининг айтишича, давлат тўнтариши режаси амалга ошмаган. Унинг қўшимча қилишича, давлат тўнтаришига уриниш ортида «АҚШ ҳукумати турибди».

Август ойида Николас Мадуро Х ижтимоий тармоғи кўп маротаба мамлакат қонунчилигини бузганини, шу боисдан Венесуэлада унинг фаолияти тўхтатилганини маълум қилганди. Давлат раҳбарининг таъкидлашича, ижтимоий тармоқ нафрат, фашизм, фуқаролар уруши, венесуэлаликлар ўртасидаги қарама-қаршиликни қўзғатиб, Венесуэланинг барча қонунларини бузган.

Аввалроқ Венесуэла ҳукумати Николас Мадуро сайловларда ғалабага эришганини эълон қилганидан кейин ўнлаб журналист ва фаолларнинг хорижга чиқиш паспортларини бекор қилганди.