ЕИ давлатлари депортация бўйича янги қоидаларни зудлик билан қабул қилишни талаб этди

Европа Иттифоқи давлатлари муҳожирларни депортация қилиш тартибини тезлаштиришга қаратилган янги қоидаларни зудлик билан қабул қилишга чақирмоқда. 17 октябр, пайшанба куни Брюсселда эълон қилинган ЕИ саммити декларациясининг миграция бўлимида Европа Иттифоқи ноқонуний муҳожирларни чиқариб юборишни осонлаштириш ва тезлаштириш учун «барча даражаларда қатъий чоралар кўришга чақириши» айтилади.

Европа Иттифоқи етакчилари, шунингдек, иммиграциянинг сиёсий эксплуатациясига қарши курашиш ва Европа Иттифоқининг ташқи чегараларини «барча мавжуд воситалар ёрдамида ҳамда Европа ва халқаро ҳуқуқни ҳурмат қилган ҳолда» ҳимоя қилишга қатъиятли эканликларини яна бир бор тасдиқладилар. Декларацияда таъкидланишича, Россия, Беларус ва бошқа давлатлар «қадриятларимизни, жумладан, бошпана олиш ҳуқуқини суиистеъмол қилишига ва демократиямизга путур етказишига» йўл қўймаслик керак. Европа Кенгаши Полша ва ушбу муаммоларга дуч келаётган бошқа давлатларга бирдамлик билдирди.

Саммит декларациясида «истисно ҳолатлар тегишли чоралар кўришни талаб қилиши» ҳам таъкидланган.

Евроиттифоқ миграцияни тартибга солувчи янги қонун тайёрламоқда

Еврокомиссия Европа Иттифоқида қолиш ҳуқуқига эга бўлмаган муҳожирларни ватанга жўнатиш қоидаларини ўзгартириш билан боғлиқ қонун лойиҳасини тайёрламоқда. Бу Европа Иттифоқи раҳбари Урсула фон дер Ляйеннинг 14 октябр куни кечқурун чоп этилган Европа Иттифоқи давлатларига йўллаган мактубида айтилган.

Қонун лойиҳасида «чиқариб юбориш бўйича ҳамкорликнинг аниқ мажбуриятлари» белгиланиши кутилмоқда ва ноқонуний иммигрантларни уйларига юбориш «жараёнини самарали тарзда тартибга солиш» керак, дейилади фон дер Ляйен мактубида.

Европа Комиссияси раисининг сўзларига кўра, Европа Иттифоқи ўз ҳаракатлари самарадорлигини ошириш учун «янги ҳуқуқий базага муҳтож». Мамлакатлар Европа Иттифоқига аъзо ҳар бир давлат бошқасининг қарорини тан олиши учун «уйғунлик ва ишонч даражасини» яратиши керак. «Бу Европа Иттифоқининг бошқа давлатида бўлганида депортациядан қочишнинг олдини олиш учун шарт», деб таъкидлайди ЕК раҳбари.