Британияда норовирусга қарши дунёдаги биринчи вакцинани синовдан ўтказиш бошланди

Шифокорларнинг сўзларига кўра, ҳар йили дунёда 685 миллионга яқин одамда норовирус аниқланади ва беморларнинг 200 мингга яқини вафот этади.

Фото: PA images

Британиялик шифокорлар норовирусга (гастроэнтерит эпидемияларининг асосий қўзғатувчиси) қарши вакцинани синовдан ўтказишни бошлади, деб хабар беради The Guardian.

«Шифокорлар норовирусга қарши дунёдаги биринчи вакцинани синовдан ўтказишни бошлади», — деб ёзади нашр.

Агар норовирусга қарши вакцина муваффақиятли чиқса, Moderna фармацевтика компанияси мазкур дори воситасини 2026 йил рўйхатдан ўтказишга ариза беради. Аризани кўриб чиқиш жараёни бир йилгача вақт олади. Вакцинанинг кейинги синовлари эса ўсмирлар ва ёш болаларда ўтказилади.

Буюк Британия умумий амалиёт шифокори ва синовларнинг бош тадқиқотчиси Патрик Мурнинг сўзларига кўра, айни вақтда дунёда норовирусга қарши тасдиқланган вакцина мавжуд эмас. Унинг таъкидлашича, ҳар йили дунёда 685 миллионга яқин одамда норовирус аниқланади ва беморларнинг 200 мингга яқини вафот этади.

Вакцинанинг клиник синовлари икки йилга чўзилади — унда дунёнинг турли давлатларидан 25 минг киши, биринчи навбатда, 60 ёшдан катталар иштирок этади. Тадқиқот давомида иштирокчиларнинг ярми тасодифий тарзда вакцина, қолган ярми эса плацебо сифатида «физраствор» инъекциясини олади.