Трампнинг митингида чиқиш қилган комик Пуэрто-Рикони «чиқинди ороли» деб атади. Демократлар ҳам, республикачилар ҳам ғазабда

Доналд Трампнинг митингида чиқиш қилган комик Пуэрто-Рикони «сузувчи чиқинди орол» деб атагани демократлар қатори республикачиларнинг ҳам ғазабнок реакцияларига сабаб бўлди.

Комик Тони Ҳинчклифф Трампнинг Ню-Йоркдаги Мэдисон-сквер-гарденда ўтказилган сайловолди митингига таклиф этилган юлдузлардан эди.

Ўз чиқишида Kill Tony тахаллуси билан танилган Ҳинчклифф шундай деди: «Кўп нарса бўлиб ўтмоқда. Бундан хабарингиз борми билмайман, аммо ҳозирда океан ўртасида том маънода чиқинди ороли сузиб юрибди. Уни Пуэрто-Рико деб аташади».

Пуэрто-Рико ҳақидаги луқмадан ташқари, у ирқчиликка йўғрилган бир неча ҳазиллар қилган ва лотин америкаликлар «бола туғдиришни ёқтириши»ни айтган.

Бу келиб чиқишига кўра пуэрторикалик рэпер, шоу-бизнес оламидаги энг машҳур лотин америкаликлардан бўлмиш Bad Bunny президентлик сайловларида Ҳарриснинг номзодини қўллаши ортидан рўй берди.

Трампнинг маслаҳатчиси Пуэрто-Рико ҳақидаги ҳазилни ўзидан соқит қилган, буни Трампнинг Демократик партиядан бўлган рақиби Камала Ҳаррис ҳам қоралаган. Унинг ўзи ҳам Трампнинг митингида чиқиш қилган бошқа оратор нишони бўлганди.

Келиб чиқишига кўра Пуэрто-Рикодан бўлганлар кўпчиликни ташкил қилувчи Флорида штатидан бўлган икки нафар республикачи конгрессмен ҳам ҳазилни қоралаганлар орасида ва улар бу билан демократларга қўшилишди.

Конгрессвумен Мария Элвира Салазар «ирқчилик руҳидаги сўзлар»дан «кўнгли беҳузур» бўлганини айтган. Унинг айтишича, бу «Республикачилар партияси қадриятларини ифодаламайди». Шунингдек, Салазар Америка армиясида хизмат қилувчи минглаб пуэрторикаликлар ҳақида эслатган.

АҚШ сенатори Рик Скотт X ижтимоий тармоғида шундай ёзган: «Бу ҳазил бежиз муваффақиятсизликка учрагани йўқ. У кулгили ва ёлғон». Ва «пуэрторикаликлар — ажойиб одамлар ва ажойиб америкаликлар» эканини қўшимча қилган.

Пуэрто-Рико — АҚШнинг Кариб денгизидаги орол ҳудуди. Унинг аҳолиси АҚШ президентлиги сайловларида овоз беролмайди, аммо АҚШда пуэрторикаликларнинг катта диаспораси мавжуд ва уларга овоз бериш ҳуқуқи тақдим этилган.

Трамп митингида чиқиш қилган бошқа нотиқлар ҳам ўз луқмалари билан оловга мой сепишган. Трампнинг болаликдаги дўсти Дэвид Рем Ҳаррисни «иблис» ва «дажжол» деб атаган, Трампнинг собиқ адвокати Руди Жулиани Демократик партия номзоди Ғазодаги можарода «террорчилар томонида» эканини айтган (бу эса тўғри эмас).

Таклиф этилган спикерларнинг сўзлари кўпроқ шов-шув кўтарган бўлса-да, Трамп ҳам эътиборга молик гаплар айтди, хусусан, ота-онаси ёки яқин кишиларига ғамхўрлик қилувчилар учун солиқ имтиёзлари жорий этиш режасини эълон қилди. Шунингдек, «ёвуз ва қонхўр жиноятчилар» томонидан «эгаллаб олинган ва забт этилган» жойларни «қутқариш» учун ноқонуний мигрантларни ёппасига депортация қилишини айтган.

Камала Ҳарриснинг штаби Трампнинг митингида чиқиш қилганларнинг гапларини «ажратувчи ва камситувчи» деб атаган.

Якшанба куни Ҳаррис Пуэрто-Рико аҳолисига ёрдам кўрсатиш чораларини эълон қилиб, ота-онаси худди Bad Bunny билан бўлгани каби пуэрторикалик бўлган Женнифер Лопеснинг қўлловига эришганди. Уни шоу-бизнеснинг бошқа кўплаб намояндалари ҳам қўллаб-қувватлаган.

«Мана улар биз ҳақда нима деб ўйлайди», — деган пуэрторикалик қўшиқчи Рики Мартин республикачилар ҳамда Ҳинчклиффнинг ҳазилини назарда тутган ҳолда ва ўз мухлисларини Ҳаррисга овоз беришга чақирган.

Pew Research тадқиқот маркази маълумотига кўра, бу сайловларда овоз бериш ҳуқуқига эга бўлган испан тилли аҳоли сони 36 миллионни ташкил этади. Уларнинг кўпчилиги демократларни қўллайди, аммо республикачилар сўнгги вақтларда уларнинг бир қисмини ўз томонига оғдиришга муваффақ бўлмоқда.