Трамп ўзи ўлдирилган тақдирда Эронни «бомбалаб ташлашни» буюрди

Бу ҳақда у New York Post нашрига берган интервьюсида маълум қилди.

«Мен уларнинг рўйхатида анчадан бери борман. Биз шу билан шуғулланяпмиз. Мен фақат кўрсатма қолдирдим: агар ўзим билан бирор нарса содир бўлса, уларни ҳеч қачон кўрилмаган даражада бомбардимон қилинг», деди Трамп.

Шу ҳафта Исроил АҚШни Эроннинг президентни ўлдириш учун янги фитнаси ҳақида огоҳлантиргани ҳақидаги хабарларга жавобан Трамп гап янги режа ҳақида эмас, балки Теҳрон кўп йиллардан бери унинг ўлимини хоҳлаётганини айтди.

«Йўқ, йўқ. Исроил янги нарсани топмади. Мен аллақачон Эрондаги қотиллар рўйхатида биринчи ўринни эгаллаганман. Умид қиламанки, мени соғинасиз», деб қўшимча қилди у.

NYP нашрининг ёзишича, Эрон 2020 йилда ҳарбий арбоб Қосим Сулаймонийни йўқ қилиш тўғрисида буйруқ берганидан бери Трампни ўлдиришга очиқчасига интилмоқда. Бу вақт ичида президентга қарши бир нечта суиқасдларнинг олди олинди, жумладан, 2024 йил 13 июль куни Пенсилвания штатининг Батлер шаҳрида бўлиб ўтган сайловолди митингида ўқ унинг қулоғига тегиб ўтган эди.

Бу ҳафта АҚШ ва Эрон ўртасидаги кескинлик кучайди. АҚШ ва Исроил операцияси бошида ўлдирилган Эрон олий раҳбари Али Хоминаийни дафн этиш маросимида намойишчилар Трампни ўлдиришга чақирувчи улкан баннерларни ёйишди.

Икки кун олдин Трамп журналистларга суиқасд қурбони бўлиши мумкинлигини айтган эди.

Эртаси куни Трамп Анқарадаги НАТО саммитидан ўтган йили Қатар томонидан совға қилинган самолёт ўрнига эски Air Force One самолётида (биринчи рақамли борт) учиб кетди, деб ёзди The New York Times. Америка етакчиси бу қарорни Махфий хизмат тавсиясига кўра қабул қилди, дейилади мақолада.

Март ойида Трамп Эрон ҳукумати уни икки марта ўлдиришга уринганини айтган эди. Кейин у тахмин қилинган суиқасдларни АҚШ ва Исроилнинг Эронга зарба бериш қарори ва республика олий раҳбари Али Хоминаийнинг ўлдирилиши билан боғлади.

Теҳрон суиқасд уюштиришга тайёргарлик кўриш ҳақидаги айбловларни рад этди.