Британиядаги атом сувости кемалари ишлаб чиқариладиган корхонада ёнғин юз берди

Британиянинг BAE Systems мудофаа компаниясига тегишли Devonshire Dock Hall (DDH) кемаларни таъмирлаш корхонасида ёнғин юз берди. Маҳаллий полицияга кўра, ёнғин бошланган вақтда корхонада Британия атом сувости кемаси бўлган.

Ҳодиса оқибатида икки киши жароҳатланган, улар тутундан заҳарланиш билан шифохонага ётқизилган. Таъмирлаш корхонасида бўлган барча ишчилар эвакуация қилинган, маҳаллий аҳолига эшик-деразаларни ёпиш ва зарурат бўлмаса кўчага чиқмаслик тавсия қилинган.

Полициянинг қайд этишича, ядровий ҳодиса хавфи йўқ. BAE Systems компанияси ёнғинни ўчириш бўйича фавқулодда хизматлар билан ҳамкорлик олиб бораётганини маълум қилди.

Лондондан 350 километр шимоли-ғарбда жойлашган кемасозлик корхонаси 150 йил олдин қурилган. Айни вақтда у ерда Буюк Британия Қироллик флоти учун бир нечта атом сувости кемалари қурилмоқда. Гап Astute ва Dreadnought туридаги сувости кемалари ҳақида кетмоқда.

BAE Systems — дунёдаги энг йирик қурол ишлаб чиқарувчилардан бири. У танк ва қирувчи самолётлар каби жанговар техникаларни ҳам ишлаб чиқариш билан шуғулланади.