Европада сунъий интеллект сабаб миллионлаб иш ўринлари хавф остида қолмоқда

Жадаллик билан ривожланиб бораётган сунъий интеллект туфайли Европада 2027 йилга бориб 83 миллионта иш ўрни тугатилади. Бу ҳақда Жаҳон иқтисодий форуми прогнозларига таяниб, Euronews хабар берди.

Қайд этилишича, 2030 йилга бориб 94 миллион европалик ишчи автоматлаштиришнинг ривожланиши сабаб қайта тайёрловга муҳтож бўлади. Ишчиларига сунъий интеллект хавф туғдираётган соҳалар қуйидагилар: меҳмонхона ва умумий овқатланиш бизнеси (94 фоиз), санъат (80 фоиз), улгуржи ва чакана савдо (68 фоиз), қурилиш (58 фоиз), шунингдек, транспорт ва логистика (50 фоиз).

«2030 йилга бориб 21 миллион киши ўз соҳасини ўзгартиришга мажбур бўлиши мумкин. Ушбу инсонларнинг аксарият қисми олий маълумотга эга эмас», — дейилади хабарда.

Шу билан бирга, Жаҳон иқтисодий форуми маълумотларига кўра, яқин йилларда бошқа йўналишларда иш ўринлари сони сезиларли даражада ошиши кутилмоқда: 69 миллионга яқин янги вакансиялар пайдо бўлади. Аммо Европада мазкур иш ўринлари нотекис тақсимланиши мумкин: европаликларнинг 40 фоизга яқини меҳнат бозори қисқарадиган ҳудудларда қолиб кетади. Тадқиқотда мазкур минтақаларга ёрдам бўлиши учун масофадан туриб ишлашни рағбатлантириш таклиф этилмоқда.

«Айни вақтда Европада меҳнат унумдорлиги Амстердам, Копенгаген, Лондон, Мадрид, Мюнхен ва Париж каби бир нечта меҳнат бозорларида жамланган», — дея таъкидланади хабарда. Мазкур шаҳарларда Европа аҳолисининг 20 фоизи яшайди, аммо ЯИМнинг 43 фоизи, иш ўринлари ўсишининг 35 фоизи улар ҳисобига тўғри келади.