2024 йилда ўртача глобал ҳарорат 1,5 даражага ошади. Иқлим бўйича Париж келишувида бунга йўл қўймаслик белгиланган

2024 йил энг иссиқ календар йилига айланиши кутилмоқда. Жорий йилда ўртача глобал ҳарорат 1850-1900 йиллардаги саноат давригача бўлган кўрсаткичдан 1,5 даража Целсийга ошиши мумкин. Бу ҳақда Европадаги Cоперниcус иқлим ўзгариши хизмати хабар берди.

Маълумотларга кўра, 2023 йилда ўртача глобал ҳарорат саноат давригача бўлган кўрсаткичдан 1,48 даражага кўтарилган.

Экспертларнинг айтишича, 2024 йилнинг октябри кузатувлар тарихидаги энг илиқ октябр ойи бўлади (2023 йилдан кейин). Ўтган йили ҳавонинг ўртача глобал ҳарорати 15,25 даражани ташкил этган. Бу 1991-2020 йиллардаги октябр ойларига қараганда 0,8 даражага юқори.

BBC’нинг қайд этишича, ҳароратнинг кўтарилишига инсон фаолияти натижасида юзага келаётган иқлим ўзгариши, шунингдек, Эл-Нино каби иқлим феноменлари таъсир кўрсатмоқда.

Дунё давлатлари томонидан 2015 йилда қабул қилинган Иқлим бўйича Париж келишувида ўртача глобал ҳароратнинг 1,5 даража Целсийдан ошиб кетишига йўл қўймаслик белгиланган.

Аввалроқ октябр ойи метеорологик кузатувнинг барча йиллари учун энг ёмғирли бўлганини маълум қилганди. Шу билан бирга, Қорақалпоғистон Республикаси, Хоразм вилоятининг қатор туманларида ва Қизилқум чўлининг ғарбий қисмидаги баъзи жойларда ёғингарчилик меъёрдан кам бўлиши кузатилган.