Шавкат Мирзиёев Муҳаммад бин Салмон билан учрашди

Навбатдан ташқари араб-ислом саммити доирасида Ўзбекистон Республикаси президенти Шавкат Мирзиёев Саудия Арабистони подшоҳлиги валиаҳди, бош вазири Муҳаммад бин Салмон Ол Сауд билан учрашув ўтказди.

Ўзбекистон-Саудия кўп қиррали муносабатларини янада кенгайтиришнинг долзарб масалалари муҳокама қилинди.

Шавкат Мирзиёев суҳбат аввалида Ар-Риёддаги фавқулодда саммит ўз вақтида ташкил этилгани ва долзарб аҳамиятга эга эканини таъкидлади.

Турли даражалардаги фаол мулоқот ва алмашинувлар давом этаётгани катта мамнуният билан қайд этилди. Ўзаро савдо ва инвестициялар ҳажми, қўшма корхоналар сони ошиб бормоқда.

“Яшил” энергетика, транспорт инфратузилмасини модернизация қилиш, коммуникациялар соҳасида, қишлоқ хўжалиги, саноатда янги қўшма лойиҳаларни илгари суриш масалалари кўриб чиқилди.

Бўлажак олий даражадаги тадбирларга, шу жумладан 2025 йилда Самарқанд шаҳрида бўлиб ўтадиган “Марказий Осиё – Кўрфаз араб давлатлари ҳамкорлик кенгаши” мулоқотининг иккинчи саммитига тайёргарлик кўришга алоҳида эътибор қаратилди.

Учрашув давомида Ўзбекистон етакчиси фуқароларимиз Ҳаж ва Умра зиёратларини адо этишларига яратилган шароитлар учун Саудия Арабистони раҳбариятига миннатдорлик билдирди.

Минтақавий масалалар, жумладан, Яқин Шарқдаги вазиятни тинч йўл билан ҳал этиш юзасидан ҳам фикр алмашилди.

Аввал хабар берилганидек, Шавкат Мирзиёев Ар-Риёдга амалий ташрифи доирасида навбатдан ташқари араб-ислом саммитида нутқ сўзлади. Президент, шунингдек, Саудия Арабистони энергетика вазири шаҳзода Абдулазиз бин Салмон Ол Сауд ва инвестициялар вазири Холид ал-Фалиҳни қабул қилди.

Тадбирлар якунлангач, президент Озарбойжонга жўнаб кетди. Мирзиёев 12-13 ноябр кунлари Бокуда БМТнинг Иқлим ўзгариши бўйича ҳадли конвенцияси Томонлари конференциясининг 29-сессияси (COP29) тадбирларида қатнашади.

#Саудия Арабистон #Муҳаммад бин Салмон #Шавкат Мирзиёев