Нодавлат боғчалар ва мактаблар барча турдаги солиқ ва йиғимлардан озод қилинади

«Таълим соҳасида хусусий сектор иштирокини ошириш бўйича қўшимча чора-тадбирлар тўғрисида»ги президент қарори қабул қилинди.

Фото: Kun.uz

Қарор билан 2030 йил 1 январга қадар нодавлат мактабгача ва умумий ўрта таълим ташкилотлари:

- барча турдаги солиқ (бундан ижтимоий солиқ мустасно) ва йиғимлардан озод қилинади;

- унда меҳнат фаолиятини амалга ошираётган чет эллик ўқитувчи ва мутахассислар жисмоний шахслардан олинадиган даромад солиғи ва ижтимоий солиқ тўламайди.

Шунингдек, 2030 йил 1 январгача нодавлат мактабгача ва умумий ўрта таълим ташкилотлари Ўзбекистонда ишлаб чиқарилмайдиган қуйидаги товарларга божхона тўловлари тўламайди (божхона расмийлаштируви учун йиғимлар бундан мустасно):

- замонавий ўқув ва лаборатория ускуналари;

- компютер техникаси ва дастурий маҳсулотлар;

- ўқув ва илмий-методик адабиётлар, анжомлар ва моддий-техник ресурслар.

2025 йил 1 январдан бошлаб:

- нодавлат таълим ташкилотларига доимий жалб этиладиган педагог хорижий мутахассисларга «А-2» ўқитувчи кириш визаларини бериш йўлга қўйилади;

- давлат ва нодавлат таълим ташкилотлари томонидан хориждан жалб қилинган мутахассисларга меҳнат қилиш ҳуқуқини берувчи тасдиқнома бериш йиғим миқдори БҲМ 30 бараваридан 1 бараваригача камайтирилади.

#мактаб таълими #Мактабгача таълим #солиқ имтиёзи