Нигерияда ноқонуний нефт заводлари йўқ қилинди

Нигерия армияси Нигер дарёси делтасидаги нефт контрабандачиларига қарши махсус операция ўтказган ва нефтни қайта ишлаш билан шуғулланувчи корхоналар йўқ қилинган. Бу ҳақда армия вакили Данжума Жона Данжума маълум қилди.

Фото: businessday.ng

Данжуманинг сўзларига кўра, операция натижасида 56 корхона йўқ қилинган, 1,2 миллион литр нефт мусодара қилинган. Шунингдек, бу ноқонуний ишларга алоқадор 17 киши қўлга олинган ва контрабандачиларга тегишли 20 та кичик кемалар тортиб олинган.

Нефтнинг ноқонуний истеъмоли Нигерия иқтисодиётига жиддий салбий таъсир кўрсатмоқда. Сенатор Нед Нвоконинг маълум қилишича, 2023 йилда нефт ўғирлаш ва қувурларга қилинган ҳужумлар туфайли мамлакат 3 миллиард доллардан ортиқ зарар кўрган.

Нигериянинг тасдиқланган нефть захиралари тахминан 37 миллиард баррелни ташкил этиб, бу жаҳон захираларининг 3,1 фоизига тўғри келади. Шу билан бирга, Нигерия дунёнинг энг йирик нефт ишлаб чиқарувчи 15 мамлакати қаторига киради, энг кўп нефт захираларига эга бўлган мамлакатлар рўйхатида 8-ўринда ва нефт экспорт қилиш бўйича 6-ўринда туради.