iPhone ва Samsung фойдаланувчиларининг аксарияти сунъий интеллектни фойдали деб ҳисобламайди

Американинг SellCell тадқиқот компанияси Қўшма Штатлардаги икки мингдан ортиқ iPhone ва Samsung фойдаланувчилари ўртасида сўров ўтказди ва янги смартфон эгаларининг аксарияти сунъий интеллектни (СИ) фойдали деб ҳисобламаслигини аниқлади.

Сўровда сунъий интеллектга эга iPhone моделлари (iPhone 16, iPhone 15 Pro ва 15 Pro Max) ва шунга ўхшаш имкониятларга эга Samsung Galaxy смартфонлари (Galaxy S24, S23, S22 серияли, шунингдек, букланувчи Z Fold 6, 5, 4) фойдаланувчилари иштирок этди.

Қайд қилинишича, iPhone фойдаланувчиларининг 73 фоизи ва Samsung Galaxy эгаларининг 87 фоизи СИ хусусиятлари уларга ҳеч қандай фойда келтирмаслигини айтган. Шу билан бирга, сўровда қатнашган iPhone эгаларининг 58,4 фоизи Apple Intelligence функцияларидан умуман фойдаланмаган, Samsung фойдаланувчилари орасида эса 53,1 фоизи Galaxy СИ имкониятларини эътиборсиз қолдирган.

Қизиғи шундаки, иштирокчилар орасида iPhone фойдаланувчиларининг 16,8 фоизи сунъий интеллектнинг яхшироқ функциялари учун Samsung смартфонларига ўтишни ўйламоқда, Samsung эгаларининг атиги 9,7 фоизи худди шу сабабга кўра iPhone смартфонларига ўтишга тайёр. Бироқ, умуман олганда, СИ кўпроқ Apple аудиториясига мос келадиган кўринади: iPhone фойдаланувчиларининг 47,6 фоизи янги смартфон танлашда сунъий интеллектни асосий омил деб билади, Samsung кўрсаткичи эса пастроқ — 23,7 фоиз.

Энг оммабоп Apple Intelligence функциялари матн воситалари (72 фоиз), билдиришномалар хулосалари (54 фоиз) ва «Почта»даги устувор электрон почта хабарлари (44,5 фоиз) бўлган. Шунингдек, фотосуратлардаги объектларни ўчириш (29,1 фоиз) ва «Почта» ва «Хабарлар»даги ақлли жавоблар (20,9 фоиз) ҳам машҳур бўлган.

Сўров натижалари шуни кўрсатадики, смартфонларда сунъий интеллект ривожланишига қарамай, фойдаланувчиларнинг катта қисми ҳали янги имкониятларнинг амалиётда қўлланишидан маъно кўрмайди.