Тўқаев Қозоғистонни атом энергетикаси ривожланган давлатга айлантирмоқчи

Президент Қосим-Жўмарт Тўқаев Қозоғистон ривожланган ядровий энергетикага эга мамлакатга айланиши учун бир нечта атом электр станциясини қуриш бўйича ишларни тезлаштириши кераклигини маълум қилди, деб хабар беради Оқўрда матбуот хизмати.

«Атом электр станцияларини қуришни тезлаштириш керак. Интервюда айтганимдек, яна иккита, балки учта катта станция қурамиз. Биз Қозоғистонни ядровий энергетикаси ривожланган, сунъий интеллект ва рақамлаштириш тўлиқ ишлайдиган мамлакатга айлантиришимиз керак», — дейди Тўқаев Остонадаги Лойиҳа офисига ташрифи давомида.

Тақдимотлар билан танишиб чиққан Қозоғистон президенти ҳукумат аъзолари асосий эътиборни мамлакатни ижтимоий-иқтисодий ривожлантиришда салмоқли натижа келтирадиган ҳаракатларга қаратишлари кераклигини таъкидлади.

Аввалроқ Тўқаев «Она тили» газетасига берган интервюсида Қозоғистонга катта қувватли атом электр станцияси кераклигини маълум қилганди. У яқин келажакда иккинчи, эҳтимол учинчи АЭС қурилиши бошланишини истисно этмаган.

Қозоғистонда 2024 йил 6 октябр куни АЭС қуриш бўйича референдум ўтказилган эди. Унда иштирок этганларнинг 71,12 фоизи республика учун бу турдаги электр станцияси кераклигини ёқлаб овоз берган.