Bloomberg: Путин Трамп билан музокараларда Украина НАТО аъзоси бўлмаслигини талаб қилади

Шу билан бирга, агентлик манбаларининг қайд этишича, Кремл Шимолий Атлантика алянсининг алоҳида давлатлари хавфсизлик тўғрисидаги икки томонлама битимлар доирасида Киевга қуролланиш етказиб беришига қарши эмас.

Фото: AP

Владимир Путин АҚШнинг сайланган президенти Доналд Трамп билан рус—украин уруши бўйича музокаралар давомида Украина НАТО билан ҳарбий алоқаларини кескин камайтириши ва чекланган армияга эга нейтрал давлатга айланишини талаб қилади. Бу ҳақда Bloomberg агентлигининг Кремл позициясидан хабардор манбалари маълум қилди.

Уларнинг сўзларига кўра, жанг майдонида Россия қўшинларининг устунлигига тобора кўпроқ ишонч ҳосил қилаётган Путин Украинанинг НАТОга аъзо бўлишдан бош тортишига эришиб, мамлакатнинг ҳарбий салоҳиятини чекламоқчи.

Шу билан бирга, Кремл Шимолий Атлантика алянсининг алоҳида давлатлари хавфсизлик тўғрисидаги икки томонлама битимлар доирасида Киевга қуролланиш етказиб беришига қарши эмас. Аммо бу қуроллар Россияга қарши ва РФ томонидан эгаллаб олинган украин ҳудудларини қайтариб олиш учун ишлатилмаслиги керак.

Кремл, шунингдек, ҳозирда Россия армияси ва ҳукумати назорати остида бўлган Украина ҳудудларининг камида 20 фоизи устидан бошқарувни сақлаб қолишни талаб қилади. Бунга аннексия қилинган Қрим ҳам киради. Бироқ агентликнинг айрим манбаларини айтишича, Москва баъзи ҳудудларни алмашишга тайёр. Айнан қайси ҳудудлар ҳақида гап кетаётганига аниқлик киритилмаган.

Аввалроқ Reuters агентлиги Россия музокараларда қандай талабларни илгари сурмоқчи экани ҳақида ёзганди. Унинг манбаларига кўра, Путин Трамп билан Украинада ўт очишни тўхтатишни муҳокама қилишга тайёр, аммо ҳудудий жиҳатдан ёнбосишларга рози бўлмайди ва Киевнинг НАТО аъзоси бўлишига қарши.

Доналд Трамп АҚШ президентлиги сайловларида ғалаба қозонганидан кейин урушни тўхтатиш учун Владимир Путин билан учрашиш ниятида эканини маълум қилган. Трамп учрашув 20 январ куни бўлиб ўтадиган инаугурациядан кейинги ярим йил ичида ўтказилиши мумкинлигини айтган.

Трамп ўзига миллий хавфсизлик бўйича маслаҳатчи этиб танлаган конгрессмен Майк Уолцнинг таъкидлашича, Трамп ва Путин «яқин кун ёки ҳафталарда» қўнғироқлашади, уларнинг учрашувига тайёргарлик эса «қизғин давом этмоқда.