Баварияда афғонистонлик эркак болаларга пичоқ билан ҳужум қилди. Икки киши ҳалок бўлди

Бавариянинг Ашаффенбург шаҳрида 28 ёшли эркак Шентал боғида бир гуруҳ болаларга пичоқ билан ҳужум қилди. Ҳодиса оқибатида икки киши ҳалок бўлди.

Немис ОАВнинг дастлабки маълумотларига кўра, марокашлик икки ёшли бола ва болаларни ҳимоя қилишга уринган 41 ёшли эркак ҳалок бўлган. Frankfurter Rundschau’нинг ёзишича, икки киши, хусусан, Суриядан келган икки ёшли қизча жароҳат олган.

Гумонланувчи темирйўл орқали яширинишга уринган ва шаҳарда маълум муддат ҳаракат тўхтатилган, кейинроқ у қўлга олинган.

Бавария ички ишлар вазири Йоахим Херрманнинг маълум қилишича, ҳужумни 28 ёшли Афғонистон фуқароси амалга оширган. Унинг сўзларига кўра, гумонланувчи Германияга 2022 йилда келган ва бошпана учун ариза берган. Аммо кейинроқ у аризасини қайтариб олган ва жараён тўхтатилган. Херрманнинг қўшимча қилишича, ҳужум уюштирган шахс руҳий касалликлар шифохонасида даволанган.

Германия канцлери Олаф Шолц ушбу ҳужумни «тасаввур қилиб бўлмайдиган террорчилик акти», деб атади. «Ҳар бир неча ҳафтада ҳимоя топиш мақсадида бу ерга келган инсонлар томонидан амалга оширилаётган шу каби зўравонлик актларидан чарчадим», — дейди канцлер. У ҳукумат ҳужум уюштирган шахс нима учун шу вақтгача Германияда қолганини зудлик билан аниқлаши ва олинган маълумотлар натижасида хулосалар чиқариши кераклигини таъкидлади.

Бавария бош вазири Маркус Зедер бугунги кунни барча ерлар учун «даҳшатли» деб атади ва жабрланганлар тез орада соғайиб кетишига умид билдирди.