Трампга учинчи муддатга сайланишга рухсат бериш таклиф этилди

Бу ташаббус Доналд Трамп тарафдори бўлган Теннесси штатидан конгрессмен Энди Оглс томонидан илгари сурилди.

Фото: AP

АҚШ президенти Доналд Трампнинг Конгрессдаги асосий иттифоқчиларидан бири Оқ уйнинг янги раҳбарига учинчи муддатга сайланишига рухсат берувчи резолюцияни тақдим этди, деб хабар берди Fox News.

Қайд этилишича, ташаббускор — Теннесси штатидан Трамп тарафдори бўлган конгрессмен Энди Оглс. У Конституцияга президентга уч муддат, лекин кетма-кет тўрт йиллик икки муддатдан кўп бўлмаган даврга сайланишига рухсат берувчи ўзгартириш киритишни таклиф қилди.

«Ҳеч ким президент лавозимига уч мартадан ортиқ сайланиши мумкин эмас, шунингдек, кетма-кет икки муддатга сайланганидан кейин ҳам қўшимча муддатга сайланиши мумкин эмас...», дейилади ҳужжатда.

1951 йилда АҚШ Конституциясига киритилган 22-тузатишга кўра, шахс икки муддатдан ортиқ мамлакат президенти лавозимини эгаллаши мумкин эмас.

Энди Оглс журналистларга Трамп «замонавий тарихда миллатни таназзулга юз тутишини орқага қайтара оладиган ва Американи буюкликка қайтара оладиган ягона шахс» эканини айтди. Унга кўра, шунинг учун ҳам республикачига учинчи марта Оқ уй раҳбари бўлиш имкониятини бериш керак.

2024 йил охирида Трампнинг ўзи ҳам Вакиллар палатасидаги республикачиларга учинчи президентлик муддати ҳақида гапирган эди. Кейинроқ, унинг гаплари жиддий эмаслиги айтилди.

Оглс таклифи амалга ошиши учун АҚШ Конституциясига тузатиш киритишга тўғри келади, бу эса ўта мураккаб жараён. У фақат муҳим консенсус билан амалга оширилиши мумкин ва иккита асосий босқични ўз ичига олади: тузатишни таклиф қилиш ва уни ратификация қилиш. Конституцияга киритиладиган тузатиш фақат федерал ва минтақавий даражада кенг қўллаб-қувватланганда амалга оширилишини таъминлаш учун жараён мураккаб қилинган.

#АҚШ #Доналд Трамп #конституция