Илон Маск Ла-Манш бўғози номини ўзгартиришни таклиф қилди

Тадбиркор бўғозга АҚШ биринчи президенти Жорж Вашингтон номини беришни таклиф қилди.

Фото: AFP

Америкалик миллиардер ва АҚШ президенти Доналд Трампнинг яқин ҳамкори Илон Маск Англия ва Францияни ажратиб турувчи Ла-Манш бўғози номини ўзгартиришни таклиф қилди.

Маск бўғозга АҚШ биринчи президенти Жорж Вашингтон номини беришни таклиф қилди. У, шунингдек, янгича номланган бўғоз харитасини эълон қилди.

«Англия ва Францияни ажратиб турувчи бўғознинг янги номи», деб изоҳ қолдирди Маск.

Ла-Манш ёки Англия канали - Франция қирғоқлари ва Буюк Британия ороли ўртасидаги бўғоз. Па-де-Кале билан биргаликда Шимолий денгизни Атлантика океани билан боғлайди. Ла-Манш бўғознинг французча номи бўлиб, камида XVII асрдан бери қўлланади.

Аввалроқ АҚШ президенти Доналд Трамп қарорига кўра, Мексика кўрфази номи Америка кўрфази деб ўзгартирилди. Шунингдек, Шимолий Америкадаги энг баланд тоғ Денали номига МакКинли номи қайтарилди.

Тайёрлаган: Сардор Юсупов

#АҚШ #Илон Маск #Ла-Манш бўғози