Японияда 2024 йилда болалар ўртасида рекорд даражада ўз жонига қасд қилиш ҳолатлари қайд этилди

Японияда 2024 йилда мактаб ўқувчилари ва мактабгача бўлган ёшдаги болалар ўртасида ўз жонига қасд қилиш ҳолати 1980 йилги рекордни янгилади. Шу билан бирга мамлакатда суицид ҳолатларининг умумий сони камайди. Бу ҳақда ҳукумат бош котиби Кэйитиро Татибана маълум қилди, деб хабар беради NHK.

Япония Соғлиқни сақлаш вазирлиги маълумотларига кўра, ўтган йил давомида Японияда 20 минг 268 та ўз жонига қасд қилиш ҳолати қайд этилган — бу 2023 йилга нисбатан 1569 тага кам. Суицидни асосан эркаклар содир этган (13 минг 763 киши). Болалар орасида ўз жонига қасд қилиш кўрсаткичи 527 тани ташкил этган бўлиб, уларнинг аксарияти юқори синф ўқувчиларидир (349 нафар). Ўрта мактабнинг кичик синфларида ўқийдиган 163 нафар ўқувчи ва бошланғич мактабнинг 15 нафар ўқувчиси ҳам ўз жонига қасд қилган.

«Бошланғич, ўрта ва юқори мактаб ўқувчилари орасида ўз жонига қасд қилиш ҳолатларига жиддий ёндашамиз. Болалар ҳаётини ҳимоя қилиш ва ҳеч кимни ўзини ўлдиришга мажбур қилмайдиган жамият яратиш учун барча ишни қилишни давом эттирамиз», — дейди Татибана.

Япония аҳолиси 124,5 миллион кишидан ошади. Мамлакатда мактаб ўқувчилари ўртасида ўз жонига қасд қилишнинг бундан олдинги энг юқори кўрсаткичи 2022 йилда қайд этилганди (514 киши). Бунга коронавирус пандемиясидан кейин мактабларда дарслар қайта тиклангани сабаб қилиб кўрсатилган. Бунга қадар Японияда ўз жонига қасд қилиш ҳолатлари кетма-кет 10 йилдан бери камайиб келган. Суицидлар сони ўшиб бораётгани фонида япон ҳукумати 2021 йилда ёлғизликка қарши курашиш дастурини тасдиқлаган, шунингдек, мамлакатда ёлғизлик муаммолари билан шуғулланувчи вазир лавозими жорий этилган.