Роналду: «Ўғлимга Мбаппе ёқади, у «Дада, Килиан сиздан яхшироқ» деди. Мен эса «Ким кўпроқ гол урган?» деб сўрадим»

Криштиану Роналду журналист Эду Агирре билан суҳбатда ўғли қайси футболчига ишқибозлик қилишини айтди.

Фото: Getty images

39 ёшли португалиялик форварднинг маълум қилишича, кичик Роналду Килиан Мбаппенинг мухлиси саналади. Криштиану ўғли уни одатда Мбаппе билан таққослашини айтди.

«Ўғлимга Мбаппе ёқади. У «Дада, Килиан сиздан яхшироқ» деди. Мен эса «Ким кўпроқ гол урган?» деб сўрадим. Бу қизиқ», - дея табассум билан жавоб қайтарган Роналду.

Маълумот учун, Криштиану яқинда фаолиятидаги расмий ўйинларда 920-голини уриб, футбол тарихида бундай натижага эришган биринчи ўйинчига айланди.

Роналду «Спортинг»да 5та гол, «Манчестер Юнайтед»да – 145та, «Реал»да – 450та, «Ювентус»да – 101та, «Ан-Наср»да 85та ва Португалия миллий жамоаси сафида 134та голга муаллифлик қилган.

39 ёшли ҳужумчи футбол тарихидаги, миллий жамоалар, Европа чемпионати, Чемпионлар лигаси ва клублар ўртасидаги жаҳон чемпионатлари тарихидаги энг яхши голеадор саналади.

Франциялик 26 ёшли ҳужумчи Килиан Мбаппе эса ҳозиргача профессионал фаолиятида жами 405та ўйинда 303та голга муаллифлик қилган. Яъни, у «Монако», «ПСЖ» ва «Реал» таркибида ҳозиргача 319та ўйинда 255та гол урган бўлса, Франция миллий жамоаси сафида 86 ўйинда 48та голга муаллифлик қилган.