ЖЧда 10-кун. Германияда камбэк, Кюрасаода сенсация, португаллар лагерида можаро

Жаҳон чемпионатининг иккинчи тури ёрқин ўйинлар билан мухлисларни хурсанд қилишда давом этмоқда: Кюрасао Эквадор билан ўйинда сенсация кўрсатди (0:0), Япония Тунисни осонлик билан тор-мор этди (4:0), Нидерландия Швецияга имкон қолдирмади (5:1), Германия Кот-д' Ивуар билан ўйин охирида ғалаба голини урди (2:1).

Майдон ташқарисида ҳам эътиборли воқеалар бўлиб ўтмоқда: Туркия миллий жамоаси футболчилари турнирни эрта тарк этгани учун узр сўрашди, Англиядагилар мундиалда ўйналаётган тўпларнинг ғайриоддий хусусиятини пайқаб қолишди, Португалияда эса фейк хабар туфайли чиққан можаро авж олмоқда.

Швеция дарвозасига икки футболчи дубл қилди

Нидерландия – Швеция 5:1
Голлар: Бробби, 5 (1:0). Бробби, 17 (2:0). Гакпо, 47 (3:0). Гакпо, 54 (4:0). Эланга, 59 (4:1). Саммервилл, 89 (5:1)
Нидерландия: Вербрюгген, ван Дейк, ван Ҳекке, ван де Вен, Дюмфрис, де Йонг (Тил, 59), Рейндерс (Копмейнерс, 59), Гравенберҳ, Гакпо (Ланг, 90), Мален (Саммервилл, 46), Бробби (Депай, 72)
Швеция: Нордфелдт, Ҳин, Линделёф, Лагербилке, Челстрем (Бергвалл, 55), Нюгрен (Зенели, 55), Айяри (Али, 79), Гудмундссон (Строуд, 90+3), Бернҳардссон (Эланга, 55), Исак, Йокереш
Огоҳлантиришлар: Гудмундссон, 53. Айяри, 75. Бергвалл, 80

Швеция 1-турда йирик ҳисобда ғалаба қозониб, мақтовларга сазовор бўлганди (5:1). Аммо ўшанда рақиб гуруҳ аутсайдери Тунис бўлганди.  Энди эса юлдузли таркибга эга бўлган нидерландлар Япония билан дуранг ўйнаб қўйганидан кейин бор аламини шведлардан олишди (5:1).

Грэмм Поттер шогирдлари 5-дақиқадаёқ тезкор гол ўтказиб юборишди. Бу голли ҳужум максимал даражада оддий амалга оширилди: дарвозабон тўпни олдинга етказди, Бробби тўпни ютиб олди ва қанотга етказиб, ўзи олдинга югурди, чап қанотда ундан тўпни қабул қилиб олган Рейндерс олдинроқдаги Гакпога узатма берди, у эса тўпни дарвозабон ҳудудига етиб келган Броббига етказди ва ҳужумчида дарвозани ишғол этишдан бошқа вариант йўқ эди. Ва бу воқеаларнинг барчаси 10 сония ичида рўй берди.

17-дақиқада эса ушбу ҳужумчи энди ўнг қанотдан Думфрис узатган тўпни яқин масофадан туриб дарвоза тўрига киритиб юборди ва дублни расмийлаштирди.

Ўйиннинг биринчи бўлимида шведлар рақибга қараганда кўпроқ зарба беришди (9:5), Йокерешнинг ўзида учта хавфли вазият юзага келди, аммо нидерландлар дарвозабони Вербрюгген ишончли ҳаракат қилди.

Иккинчи бўлим бошида эса нидерландлар яна ташаббусни ўз қўлига олишди ва Коди Гакпо ҳам иккита бир-бирига ўхшаш голлар муаллифига айланди. 

Шведлар бироз ўтиб қарши ҳужумда Эланганинг чиройли голи билан жавоб қайтаришди, аммо якуний ҳисоб ўйин охирларида Саммервил томонидан ўрнатилди – 5:1. Нидерландлар ҳозирча расман гуруҳдан чиқишмади, аммо амалда плей-оффга тайёргарлик кўришни бошлаши мумкин.

Ундав қутқарди

Германия – Кот-д`Ивуар 2:1
Голлар: Кессе, 30 (0:1). Ундав, 68 (1:1). Ундав, 90+4 (2:1)
Германия: Нойер, Та, Шлоттербек (Рюдигер, 46), Браун, Киммиҳ, Павлович (Амири, 60), Нмеча, Мусиала (Левелинг, 60), Вирц, Сане (Ундав, 60), Ҳаверц (Горецка, 85)
Кот-д`Ивуар: Я. Фофана, Коссуну, Агбаду, Конан, Синго (Дуэ, 82), Сангаре (С. Фофана, 75), Кессе, Оулаи, Диоманде (Пепе, 85), Диалло (Адингра, 75), Бонни (Гессан, 75)

Тўрт карра жаҳон чемпионлари турнирни осон ғалаба билан бошлашганди: биринчи турда жамоага турнир дебютанти Кюрасао рақиб бўлганди. Бундестим аввалига рақибга турнир тарихидаги илк голни уриш имкониятини берган бўлса-да, кейин истаганча гол урганди (7:1). Иккинчи ўйиндаги ғалаба Германия учун узоқ кутилган плей-офф йўлланмасини тақдим этиши керак эди: немислар олдинги икки мундиалда ҳам гуруҳдан чиқа олмаганди. Иккинчи турдаги рақибни енгиш эса осон иш эмасди – биринчи турда Эквадор (1:0) устидан ғалабага эришган Кот-д'Ивуар ҳам гуруҳ масаласини шу турда ҳал қилиш учун майдонга тушганди.

Немислар, албатта, учрашув фаворити саналаётганди. Аммо жамоа ўйин стартида ишончсиз ҳаракат қилди ва ташаббусни африкаликларга бериб қўйди. Ва рақиб ўз имкониятидан фойдаланди: Франк Кессе жарима майдонида ўзига келиб қолган тўпни дарвоза тўрига жойлаб қўйди.

Шундан кейин ҳам ивуарликлар ҳимояга ётишмади, аксинча босим ўтказишда давом этишди ва номдор рақибга қараганда яхшироқ кўринди. Аммо ҳисобни ушлаб қола олишмади. Германия сафида захирадан ўйинга тушган Дениз Ундав (у олдинги ўйинда ҳам захирадан майдонга тушиб 1 гол ва 2 ассист муаллифи бўлганди) қаҳрамонга айланди: «Штутгарт» ҳужумчиси 60-дақиқада майдонга тушди ва 68- ва 90+4-дақиқаларда гол уриб, жамоасини плей-оффга олиб чиқди.

Кюрасаода ҳам очко бор

Эквадор – Кюрасао 0:0
Эквадор: Галиндес, Пачо, Инкапие, Франко (Пресиадо, 83), Алсивар (Родригес, 46), Вите, Мойзес Кайседо, Эступинян (Ангуло, 70), Йебоа (Х. Кайседо, 89), Валенсия, Плата
Кюрасао: Ром, Гари, Флоранус, Обиспо, Фонвилл (ван Эйма, 76), Бренет, Комененсия (Ромератоэ, 84), Л. Бакуна, Ж. Бакуна (Горре, 75), Чонг (Маргарита, 76), Локадиа (Кастанер, 83)
Огоҳлантиришлар: Алсивар, 38 – Л. Бакуна, 39. Ж. Бакуна, 53. Комененсия, 56. Гари, 75. Кастанер, 90

Бу ўйин олдидан Эквадор яққол фаворит эди ва амалда ҳам жанубий америкаликлар яққол устунликка эришишди – xG бўйича 3,05 га 0,48, зарбалар сони бўйича 27:10, голли вазиятлар бўйича 5:0, бурчак зарбалари бўйича 9:0, тўпга эгалик қилиш кўрсаткичи бўйича 75 га 25 фоиз.

Аммо Эннер Валенсия, Мойсес Кайседо, Первис Эступинян, Пиеро Инкапие ва Вилян Пачо каби юлдузлар жамоаси жаҳон чемпионатига илк бор чиққан рақибга қарши ҳеч нарса қила олишмади. Кюрасаоликларнинг 37 ёшли дарвозабони Элой Ром кабо-верделик Возинядан ҳам ўтиб кетди ва 15 сейв ижро этди. Унинг ҳам инстаграмдаги ўқувчилари сони ўса бошлади: ўйин арафасида унда 300 минг ўқувчи бор эди, ўйиндан кейин бу рақам миллионга қараб кетмоқда.

Ром жаҳон чемпионатининг бир ўйинида сейв ижро этиш бўйича рекорд ўрнатди (2014 йилги мундиал 1/8 финалида АҚШ миллий жамоаси посбони Белгияга қарши ўйинда ўз дарвозаси томон йўлланган 16 та зарбани қайтарганди, аммо ўшанда жамоалар қўшимча бўлимларда ҳам ўйнаган ва ўйин 120 дақиқа давом этиб, европаликларнинг 2:1 ҳисобидаги ғалабаси билан якунланганди).

Бундан ташқари, Дик Адвокат бошчилигидаги Кюрасао учун бу жаҳон чемпионатларидаги илк очкога айланди. Иккинчи тур ўйинларидан кейин КОНКАКАФ вакиллари Эквадор билан бир хил очкога эга, фақат тўплар нисбатига кўра (Кюрасао турнирни Германияга 1:7 ҳисобида ютқазиш билан бошлаганди) охирги ўринда.

Эквадор икки ўйинда 40 та зарба йўллаб, бирорта гол ура олмади: аввалига Кот-д’Ивуар билан ўйиннинг сўнгги дақиқаларида гол ўтказиб, ютқазганди (0:1), энди камтарона Кюрасаони енга олмади (0:0). Энди E гуруҳидан чиқиш учун Эквадор сўнгги турда Германияни мағлуб этиши керак бўлади. Плей-оффга чиқиш имконияти Кюрасаода ҳам сақланиб қолмоқда: бунинг учун улар Кот-д'Ивуарни мағлуб этиши керак бўлади.

Япония юбилей ўйинда порлади

Тунис – Япония 0:4
Голлар: Камада, 4 (0:1). Уэда, 31 (0:2). Д. Ито, 69 (0:3). Уэда, 83 (0:4)
Тунис: Дамен, Талби, Рекик, Бронн (Бен Амида, 46), Схири (Хедира, 90), Слимане, Абди (Ашури, 90), Валери, Саад (Гарби, 46), Межбри, Тунекти (Шауат, 65)
Япония: Д. Судзуки, Итакура, Х. Ито, Томиясу (Секо, 79), Танака, Сано, Накамура (Ю. Судзуки, 79), Доан (Сугавара, 74), Д. Ито, Камада (Д. Судзуки, 73), Уэда (Гото, 84)

Тунис – Япония ўйини натижасини олдиндан тахмин қилиш мумкин эди. Биринчи турдаги йирик мағлубиятдан кейин бош мураббийидан айрилган тунисликлар ўйини бир неча кун ичида ўзгариб қолишини кутиш тўғри бўлмасди. Японлар эса жаҳон чемпионатлари тарихидаги юбилей 1000-ўйинни ёрқин ўтказишга қарор қилишди.

Япония тўртинчи дақиқадаёқ ҳисобни очишди. Даити Камада дарвозага орқа қилиб турган ҳолда товони билан аниқ зарба йўллади.

10-дақиқада ҳисоб 2:0 кўринишини олиши мумкин эди: Уэда йўллаган зарбадан кейин тўп ҳимоячилардан бирининг оёғи орқали дарвоза тўрига йўл олди, аммо тунисликлар посбони Аймен Дамен сўнгги лаҳзада жамоасини қутқаришга улгурди – голни автоматик аниқлаш тизими тўп дарвоза чизиғини тўлиқ кесиб ўтмаган деб топди. 

Лекин Уэда биринчи бўлимнинг ўзи барибир ўз мақсадига эришди, иккинчи бўлим бошларида Дзюн Ито ҳисобни йирик кўринишга келтириб, тунислик мухлисларнинг камбэк учун умидларини сўндирди, ўйин охирида Аясэ Уэда дублни расмийлаштириб, якуний ҳисобни ўрнатди (4:0).

Турклар уялмоқда

Бир кун олдинги ўйинлар доирасида Туркия миллий жамоаси Парагвайга ютқазиб қўйганди (0:1) ва плей-оффга чиқиш имкониятини йўқотганди. Ҳолбуки турнир олдидан ушбу жамоа D гуруҳи фаворитларидан бири сифатида кўрилаётганди. Энди футболчилар мухлислардан узр сўрамоқда.

«Бутун халқимиздан узр сўрайман. Жамоамиз ёш. Олдинда ҳали турнирлар кўп. Эҳтимол, бу менинг сўнгги турниримдир, лекин ёш ўйинчиларимизни қўллаб-қувватлашингизни сўрайман», – деган TRT Spor нашрига «Интер» яримҳимоячиси Ҳоқон Чалхонўғли.

Арда Гулер ҳам шу оҳангда баёнот берди.

«Биз қаттиқ уятдамиз. Барчамиз топ-клубларда ўйнаймиз ва бу турнирда анча яхшироқ қатнашишимиз керак эди. Бирорта ҳам гол ура олмасликни қабул қилиб бўлмайди», – дейди «Реал» футболчиси.

Жо Ҳарт тўпдан қандай фойдаланиш кераклигини айтди

Англия миллий жамоасининг собиқ дарвозабони Жо Ҳарт 2026 йилги жаҳон чемпионатида фойдаланилаётган «Трионда» номли тўп юзасидан кузатувлари натижалари билан бўлишди. Унинг фикрича, 2010 йилги «Жабулани» тўплари билан бўлгани каби, бу тўп билан ҳам олис масофадан зарба берилганида дарвозабонлар учун реакция кўрсатиш жуда қийин бўлади.

«Трионда» чиндан ҳам одатий моделлардан фарқ қилади: у атиги тўртта панелдан тайёрланган. Бундан ташқари, тўп ичига маълумотларни VAR тизимига узатувчи датчиклар ўрнатилган. Буларнинг барчаси, британиялик собиқ футболчи фикрича, аэродинамик хусусиятларга кучли таъсир қилади.

BBC эфирида Ҳарт Хорватиянинг Англия дарвозасига урган биринчи голи билан боғлиқ эпизодни, шунингдек, Лионел Мессининг Жазоирга урган голларидан бирини таҳлил қилиб, дарвозабонлар тўп тезлиги ва траекториясини ҳисоблашда хато қилишмоқда, деган хулосага келди. Жонинг шунга ишончи комил: бу турнирнинг боришига жиддий таъсир кўрсатиши мумкин. Футболчилар тўпнинг бундай хусусиятини билган ҳолда, масофадан зарба беришни кўпайтиради.

Невеш ва Роналдунинг қаллиғи ўртасидаги можаро

Португалиянинг Конго ДР билан ўйиндаги муваффақиятсиз натижасидан (1:1) кейин ижтимоий тармоқларда жамоа яримҳимоячиси Жоау Невешнинг севгилиси Мадален Арагаога тааллуқлиги кўрсатилган фейк ёзишма вирусдек тарқалди. Унда ижтимоий тармоқ фойдаланувчиларидан бири гўёки унинг пости остида шундай ёзгани кўрсатилган: «Бойфрендинг – аҳмоқ. Унга тўпни GOAT (барча замонларнинг энг кучли футболчиси маъносида) Криштиану Роналдуга узатиш кераклигини айт». Бунга жавобан Арагао гўёки шундай ёзган: «Ўз GOAT’инга фаолиятини якунлаш кераклигини айт. У жуда худбин».

ОАВнинг аниқлашича, аслида бундай ёзишма бўлиб ўтмаган, бу скриншот фотошоп ёки сунъий интеллект орқали ясалган. Аммо бир қанча йирик нашрлар бу скриншотни тарқатишди. Ушбу пост машҳур Record Mexico аккаунтида ҳам пайдо бўлган ва уни Роналдунинг қаллиғи Жоржина Родригес кўриб қолган. У пост остида шундай фикр қолдирган: «Вау! Янги авлод ажойиб!»

Шундан кейин Роналдунинг минглаб мухлислари Невеш ва унинг севгилисининг инстаграмдаги саҳифаларига ҳужум қилишган. Бошқалар эса ёлғон маълумотга ишониб, реакция билдирган Жоржинанинг устидан кулишмоқда.

Бундан бироз олдин Криштианунинг синглиси Катя Авейру португаллар жамоаси яримҳимоячиси Бруну Фернандешни пассив ўйнашда айблаганди ва бу ижтимоий тармоқда жамоага нисбатан салбий фонни кучайтирди. Умуман олганда, 23 июн куни Ўзбекистонга қарши ўйнайдиган Португалия миллий жамоаси атрофидаги муҳит нотинч бўлиб қолмоқда.

21-22 июн кунги ўйинлар

21 июн куни кечқурун ва 22 июнга ўтар кечаси ЖЧ гуруҳ босқичи 2-тури доирасида яна 4 та учрашув бўлиб ўтади:

• 21.00. H гуруҳи. Испания — Саудия Арабистони
• 00.00. G гуруҳи. Белгия — Эрон
• 03.00. H гуруҳи. Уругвай — Кабо Верде
• 06.00. G гуруҳи. Янги Зеландия — Миср