ЖЧда 12-кун. Месси рекордлар китобини қайтадан ёзмоқда, Франция ўйинида 2 соатлик танаффус
|17:13 / 23.06.202613 27311 мин
Жаҳон чемпионатининг навбатдаги куни ҳам воқеаларга бой бўлди: Мбаппе ва Ҳоланд ҳам Мессидан қолишмаяпти; араблар дербисида Иордания Жазоирга ютқазди ва турнирни муддатидан олдин тарк этди.
Жаҳон чемпионатининг иккинчи тури поёнига етиб бормоқда – 22 июн куни кечқурун ва 23 июнга ўтар кечаси эса ушбу босқичда навбатдаги учрашувлар бўлиб ўтди. Кун воқеаларга бой бўлди: Аргентина Австрияни мағлуб этган ўйинда (2:0) Лионел Месси рекорд ўрнатди, Франция ҳаддан ташқари узоқ давом этган ўйинда Ироққа ҳеч қандай имконият қолдирмади (3:0), Норвегия Сенегални таслим этди (3:2), Иордания эса Жазоирга биринчи бўлиб гол урганига қарамай, якунда ютқазиб қўйди (1:2).
Футбол атрофида ҳам воқеалар давом этмоқда: ганалик шаман Ҳарри Кейнга таҳдид қилди, Жереми Доку ота бўлди, D гуруҳида эса келишилган ўйин ўтказилиши мумкин.
22 июн куни кечқурун бутун дунё нигоҳи Аргентинанинг Австрия билан ўйинига қаратилди. Мухлисларни ўйин натижасидан кўра Мессининг натижаси кўпроқ қизиқтирарди. 38 ёшли ҳужумчи жаҳон чемпионатларида урилган голлар сони бўйича янги рекорд ўрнатиш арафасида турганди. Ўйиндан олдин унинг ҳисобидаги бундай голлар сони 16 та бўлиб турганди – у германиялик Мирослав Клозедан ўзиб кетиши ва соф биринчи ўринга чиқиши учун яна битта гол керак эди.
Леода бунинг учун дастлабки имконият ўйин стартидаёқ юзага келди – 9-дақиқада ўйин бош ҳаками VAR аралашувидан кейин европаликлар дарвозасига пеналти белгилади. Аммо тажрибали форвард 11 метрдан аниқ зарба бера олмади. Бу жорий турнирда илк бор пеналти хато ижро этилиши бўлди – бунгача олти нафар футболчи ўз имкониятларидан унумли фойдаланганди.
Мавзуга оид
Лекин «Олтин тўп»нинг саккиз карра соҳиби тарихий лаҳзаларни узоқ куттирмади. У биринчи бўлим охирларида ўз мақсадига эришди ва мутлақ рекорд ўрнатди. Иккинчи бўлимга қўшиб берилган дақиқаларда эса дублни расмийлаштирди ва жорий турнир тўпурарлари пойгасида ҳам олдинга ўзиб кетди. Аргентина икки ўйинда беш гол урди ва бу голларнинг барчаси Лео ҳисобига ёзилган.
Ушбу ўйин бошланишидан анча олдинроқ синоптиклар Франция ва Ироқ ўртасидаги учрашувга Филаделфиядаги об-ҳаво ноқулайлиги халал бериши мумкинлиги ҳақида огоҳлантирганди. Амалда ҳам ўйин ёмғир остида бошланди, аммо футболчилар ўйнашга қарор қилишди.
Франция 14-дақиқадаёқ ҳисобда олдинга чиқиб олди. Биринчи турда бўлгани каби Майкл Олисе ва Килиан Мбаппе чиройли гол юзага келтиришди: «Бавария» яримҳимоячиси тўпни жарима майдонига кириб борган «Реал» форвардига етказди, у эса бор куч билан зарба бериб, олис бурчакни аниқ нишонга олди. Танаффусга яқин ёмғир икки карра кучайди ва чақмоқлар бошланди. Ҳакам ҳуштаги чалинганидан кейин футболчилар том маънода майдондан қочиб чиқишди.
Иккинчи бўлим эса ўз вақтида бошланмади. Аввалига стандарт 15 дақиқалик танаффус вақти ярим соатга оширилди, кейин яна 40 дақиқа, ундан кейин яна бир ярим соат қўшиб берилди. Якунда футболчилар фақат 2 соат-у 10 дақиқа ўтиб газонга қайтишди.
Пауза французларга таъсир кўрсатмаганди. Аксинча, ҳордиқ чиқариб олган футболчилар катта куч билан олдинга ташланишди ва Мбаппе рақиблар хатосидан фойдаланиб, жаҳон чемпионатларидаги 16-голини нишонлади ва бу борада Мирослав Клозенинг кўрсаткичига етиб олиб, Лионел Мессини таъқиб қилишда давом этди. Ўйиндаги якуний ҳисоб эса Усмон Дембеле томонидан ўрнатилди – 3:0.
Скандинавлар Сенегал билан ўйиннинг биринчи бўлимини қулай имкониятларни йўққа чиқариш билан ўтказишди. Шундай вазиятлардан бирида Эрлинг Ҳоланд дарвозабон Эдуард Мендини ҳам алдаб ўтди, аммо бўш қолган дарвозани ишғол этолмади. Шунга қарамай, бўлим охирида Маркус Ҳолмгрен Педерсон ҳисобни очди.
Иккинчи 45 дақиқаликда эса Ҳоланд уйғонди: «Манчестер Сити»нинг юлдузли форварди дублни расмийлаштирди ва Норвегиянинг жаҳон чемпионатларидаги энг яхши тўпурарига айланиб олди (4 гол). Сенегалликлар ҳам ўйинга қайтишди. Африка жамоаси сафида Исмоил Сарр ёрқин ўйин кўрсатиб, икки бор дарвозани ишғол этди. Фақат бу унинг жамоасига ёрдам бера олмади – 2:3.
Икки тур натижаларига кўра Норвегия французлар билан бир хилда 6 тадан очко жамғариб, плей-оффга чиқиш масаласини ҳал қилди. Сўнгги турда ушбу жамоалар гуруҳ пешқадамлиги учун ўзаро кураш олиб боришади. Сенегал ва Ироқда эса ҳозирча бирорта очко йўқ.
Икки жамоа ҳам турнирни мағлубият билан бошлаганди: Жазоир Аргентина қаршисида буткул ожиз қолган (0:3), Иордания эса Австрия билан ўйинда тенгма-тенг курашиб, ўйин охирида голлар ўтказиб юборганди (1:3). Иккинчи турда ютқазадиган жамоа учун плей-оффга чиқиш имконияти қолмасди.
Ўйиннинг биринчи бўлимида жазоирликлар тўпга эгалик қилиш бўйича катта устунликка эришишди (74 га 26 фоиз), вазиятлар бўйича тенглик кузатилди. Улардан фойдаланиш бўйича эса Иордания яхшироқ ҳаракат қилди: Низан Ал-Рашдон Мусо Ат-Тамарининг узатмасидан кейин дарвозабоннинг ўнг пастки бурчагини аниқ нишонга олди. Аммо бу гол натижа келтирмади.
Иккинчи бўлимда Надир Бенбуали Риёз Маҳрезнинг узатмасидан кейин бош билан гол уриб, мувозанатни тиклади. Кўп ўтмай Жазоир ҳисобда олдинга ҳам чиқиб олди: бурчак зарбаси ижро этилганида Амин Гуири барчадан илдамроқ ҳаракат қилди – 2:1. Энди Иордания учун учинчи тур натижаси ҳеч қандай аҳамият касб этмайди.
Машҳур шаман қайтди
23 июн куни Англия Гана билан ўйнайди. Томас Тухел жамоасининг Хорватияга қарши ўйинини (4:2) кўрган африкаликлар эса олдиндаги ўйинга тайёргарлик жараёнида барча воситаларни, жумладан, ноодатий усулларни ишга солмоқда.
Хусусан, ганалик машҳур шаман Нана Кваку Бонсам инглиз нашрларига берган интервюсида «Уч шерлар» форварди Ҳарри Кейнни лаънатлашини айтди. Ўзининг айтишича, у ҳеч қандай хавфли иш қилишни режалаштирмаяпти, лекин барибир рақиб ҳужумчисини тўхтатмоқчи.
«Унга жиддий жароҳат етказишни истамайман. Уни тўхтатишнинг ўзи кифоя. Ганага ёрдам бериш учун ўз ишимни қиламан», – деган Бонсам.
Ушбу шаман аввал ҳам ОАВ орқали шов-шувли чиқишлар қилган. 2014 йилги жаҳон чемпионатида Гана Португалия билан рақиб бўлганди – турнир арафасида Криштиану Роналду жароҳат олган, Нана Кваку эса бунинг учун жавобгарликни ўз зиммасига олиб, бу ҳодисани ўз мамлакати учун деб изоҳлаганди. Лекин португалиялик ҳужумчи ўйингача тикланишга улгуриб, Гана дарвозасини ишғол ҳам қилганди (2:1), шундай экан, Кейн ҳеч нарсадан хавотир олмаса ҳам бўлади.
Келишилган ўйин бўладими?
Ҳозирги регламент миллий жамоалар ўртасида келишилган ўйинлар бўлиши эҳтимолини минималлаштиришга қаратилган. Аммо бу муаммони узил-кесил бартараф этишнинг имкони йўққа ўхшайди – 2026 йилги турнирда ҳам келишилган ўйин учун асос юзага келган.
Мухлислар Парагвай ва Австралия ўртасидаги ўйинни шубҳа остига олишмоқда – D гуруҳи вакиллари 25 июн куни 3-тур доирасида ўзаро ўйнайди. Квартетдаги вазият шундайки, икки жамоани ҳам сўнгги турда дуранг натижа қониқтиради – бу ҳолда икки жамоа ҳам тўрттадан очкога эга бўлади ва биргаликда плей-оффга чиқиши мумкин.
Албатта, жамоаларни олдиндан айблаб бўлмайди. Аммо ўша куни бутун дунёнинг нигоҳи ушбу жамоа футболчиларининг ҳаракатларига қаратилган бўлади.
Доку ота бўлди
Белгиялик ҳужумчи Жереми Доку биринчи бор ота бўлди. Жамоа матбуот хизмати бу ҳақда расман маълум қилди. 24 ёшли вингер бир неча кун олдин жамоа базасини тарк этган ва Эронга қарши учрашувни ўтказиб юборганди, бунинг учун L`Equipe нашри журналисти Франс Перрон футболчини танқид қилиб чиққанди.
«Жаҳон чемпионатига чиқиш учун ўзини қурбон қилишга тайёр бўлган юзлаб футболчилар бор. Болалик орзуси, энг муҳим лаҳза. Ва сен фарзанд кўриш учун буни ташлаб кетасанми? Бу жирканч. Бундай пайтда онага ота ёнида бўлиши муҳим эмас, у статист ролини бажаради», – деганди Перрон.
Журналист дарҳол танқидлар остида қолди – унинг ўзи ҳам, у ишлайдиган нашр ҳам узр сўраб чиқишига тўғри келди. Докунинг ўзи эса бунга эътибор қаратгани йўқ, турмуш ўртоғининг ёнига йўл олди ва бахтли оталардан бирига айланди.
Навбатдаги ўйинлар
23 июн куни кечқурун ва 24 июнга ўтар кечаси иккинчи тур доирасидаги сўнгги ўйинлар ўтказилади.
