Жаҳон | 15:37 / 30.01.2025
3203
3 дақиқада ўқилади

Европа Иттифоқи Россиянинг яна 15 та банкини SWIFT'дан узмоқчи

Украинадаги уруш туфайли Россияга қарши янги санкциялар пакети доирасида яна 15 та Россия банкини SWIFT'дан узиш таклиф қилинмоқда. Россия алюминийсини импорт қилишни тақиқлаш санкциялар пакетига киритилади.

Фото: REUTERS/ Chris Helgren

Европа Иттифоқи Украинага қарши уруши сабабли Россияга қарши санкцияларнинг янги пакети доирасида яна 15 га яқин рус банкини SWIFT халқаро банк тизимидан узишни таклиф қилди, деб хабар берди Bloomberg 28 январ, сешанба куни манбаларга таяниб. Агентлик суҳбатдошлари Россиянинг қайси банкларини узиш режалаштирилганига аниқлик киритмади.

Бундан ташқари, янги, 16-санкция пакети Россия алюминийсининг импортини босқичма-босқич тақиқлаш ва Россия нефтини сотишда иштирок этаётган «соядаги флот»нинг 70 дан ортиқ кемаларига нисбатан чекловларни ўз ичига олиши кутилмоқда. 

Bloomberg манбалари таъкидлаганидек, янги санкциялар пакетини тасдиқлаш учун Европа Иттифоқига аъзо барча давлатларнинг розилиги талаб қилинади ва Венгриянинг қаршилигини ҳисобга олиб, бу чоралар маъқулланиши аниқ эмас. Россиянинг Украинага бостириб киришининг 3 йиллиги арафасида Россияга нисбатан жазоларнинг янги кучайтирилиши муҳокама қилинмоқда.

Брюссел Россияга қарши санкцияларни узайтиришга тайёрланмоқда

Евроиттифоқнинг Россияга нисбатан жорий санкциялари ҳар олти ойда бўлгани каби яна узайтирилади — бу Брюсселда Европа Иттифоқи ташқи ишлар вазирларининг 27 январ, душанба куни бўлиб ўтадиган учрашуви олдидан расмийлар ва дипломатлар томонидан айтилган тахмин. «Биз Россияга қарши санкциялар режимини узайтириш устида ишлаяпмиз ва бу санкциялар яқин кунларда қабул қилинишидан бошқа вариантни кўрмаяпмиз», — деди ЕИнинг юқори мартабали расмийси 24 январ куни Брюсселда бўлиб ўтган брифингда.

Унинг эслатишича, Россиянинг Украинадаги тажовузи муносабати билан Европа Иттифоқи уч йўналишда ҳаракат қилмоқда: Украинани қўллаб-қувватлаш, Владимир Путин сиёсатига қарши туриш ва Россиянинг Украинага қарши уруши глобал оқибатларини бартараф этиш. «Санкциялар стратегиямизнинг асосий қисмидир», деди у. Расмийнинг сўзларига кўра, бу чеклов чоралари Путин режимига Украинага қарши уруш олиб бориш учун кўпроқ активлардан фойдаланишига тўсқинлик қилиб, унга зарар етказади. «Россия тажовузкорлигини давом эттирар экан, унга қарши санкциялар қўлланилади», — деди у ва бу масала Россия газининг Украина орқали ўтиши билан ҳеч қандай алоқаси йўқлигини айтди.

27 январ куни Европа Иттифоқининг бир мамлакатидан келган вазир бу масалани Ташқи ишлар кенгашида кўтариши мумкин, дейди расмий Венгрияга ишора қилиб, бироқ Европа комиссияси бирмунча вақт олдин Россия газининг Украина орқали транзитини тўхтатиб қўймайди деган хулосага келган. Бу бутун Европа Иттифоқи ёки унинг алоҳида аъзоларининг энергия хавфсизлигига таҳдид солади.

Мавзуга оид