Молдова Европа Иттифоқидан 310 млн евро олади

Европа Иттифоқи ва Молдова республикани қўллаб-қувватлаш учун 310 миллион евро ажратиш тўғрисидаги битимни имзолади. Бу ҳақда ЕИнинг кенгайиши учун масъул еврокомиссар Марта Кос маълум қилди. Унинг сўзларига кўра, 250 миллион евро Молдованинг ўзини, 60 миллион евро эса Днестрбўйини қўллаб-қувватлашга йўналтирилади.

«Биз бугун келишиб олган стратегия Молдованинг Европа Иттифоқига яқинлашиб, ЕИ энергия тизимига интеграциялашувига ёрдам беради», — дейди Кос Молдовага уюштирган ишчи ташрифи якунида ўтказилган матбуот анжуманида. Унинг сўзларига кўра, битим Европа Иттифоқининг Молдова билан бирдамлигини намойиш этади.

Европалик амалдорнинг айтишича, Европа Иттифоқи Молдовани энергетика сектори тўлиқ мустақил бўлиб, ЕИ бозорига интеграция бўлмагунга қадар қўллаб-қувватлашда давом этади. Шунингдек, Кос «Россия энергетик мустақилликни шантажга айлантиришга уринаётганига» ЕИнинг ишончи комил эканини таъкидлаган.

31 январ куни Молдова ҳукумати ва ЕИ республикани беминнат 64 миллион еврога молиялаштириш шартномасини имзолаган. Маблағлар Днестрнинг ҳар икки қирғоғидаги энергетик инқирозни бартараф этишга ажратилган. Томонлар ушбу маблағларнинг 30 миллион евроси Днестрбўйига ёрдам учун, 34 миллион евро эса мамлакат бюджетини қўллаб-қувватлашга йўналтирилишини келишиб олган.

Россия 1 январдан Днестрбўйи ва Молдовага газ транзитини тўхтатди. Шундан сўнг, Днестрбўйида кенг кўламли энергетик инқироз бошланди. 15 январ куни республика раҳбари ёнилғи Россиядан «гуманитар ёрдам» доирасида олиб келиниши мумкинлигини маълум қилди. Молдова президенти Майя Санду ушбу қарорни ноқонуний деб атади. Натижада ЕИ ва Молдова тан олинмаган минтақани феврал ойида газ билан таъминлаш схемасини келишиб олди.