Самарқандда 1,8 млрд сўмлик электр энергиясини талон-торож қилган майнинг ферма аниқланди

Самарқандда ноқонуний майнинг фаолияти билан шуғулланувчи шахслар томонидан энергия ресурсларни талон-торож қилинишини фош этишга қаратилган назорат тадбирлари давом этмоқда. Бу ҳақда Бош прокуратура матбуот хизмати хабар берди.

Хусусан, Самарқанд шаҳридаги «С.М.» оилавий корхонаси раҳбари А.И. ва корхонага қарашли мебел цехи устаси А.Н. цехни ўзбошимчалик билан тармоққа улаб, майнинг билан шуғулланиб келгани аниқланган.

Натижада, улар жами 1,8 миллиард сўмлик электр энергияси ўғирланган.

Мазкур ҳолат юзасидан И.А. ва А.Н.га нисбатан Жиноят кодексининг 169-моддаси (ўғрилик) 4-қисми «а» банди билан жиноят иши қўзғатилган.

Эслатиб ўтамиз, ўтган йилнинг декабр ойида Самарқанд вилояти Иштихон туманида 28 миллиард сўмлик электрдан ноқонуний фойдаланган майнинг ферма аниқланган эди. Оилавий корхонага қарашли бино ён қисмида жойлашган ертўлада 89 та майнинг қурилмасини электр ҳисоблагичдан ташқари тармоққа тўғридан тўғри улаб, ноқонуний фойдаланиб келинган.