АҚШ биринчи марта БМТнинг Украина бўйича Россияга қарши резолюциясини қўллаб-қувватламади

БМТ Бош ассамблеяси 2022 йилдан бери Украинани қўллаб-қувватлашга оид олтита резолюцияни қабул қилган. Қўшма Штатлар бу сафар Россия ҳаракатларини қораловчи резолюциясини имзолашдан бош тортди.

Фото: Reuters

АҚШ Украинада жанговар ҳаракатлар бошланганидан бери биринчи марта БМТ Бош ассамблеясининг Россия ҳаракатларини қораловчи резолюциясини имзолашдан бош тортди. Бу ҳақда уч нафар дипломатик манбасига таяниб Reuters хабар берди.

Қайд этилишича, ҳужжатни имзолаган давлатлар орасида ҳарбий ҳаракатларнинг уч йиллиги муносабати билан резолюция тайёрлаган 50 дан ортиқ давлат вакиллари бор.

«Ўтган йиллар давомида Қўшма Штатлар Украинада адолатли тинчлик ўрнатилишини қўллаб-қувватловчи шунга ўхшаш резолюцияларни доимий равишда қўллаб-қувватлаб келган», — дейди агентлик суҳбатдошларидан бири. Таъкидланишича, БМТдаги овоз бериш жараёнлари ҳамон АҚШ кўмагисиз ўтиши, бироқ кенг кўламда қўллаб-қувватланмаслиги мумкин.

Резолюция матнида муаллифлар «халқаро ҳамжамият томонидан тан олинган чегаралар доирасида Украинанинг суверенитети, мустақиллиги, бирлиги ва ҳудудий яхлитлигига содиқликларини» яна бир бор тасдиқлаган. Ҳужжатда «деэскалация, жанговар ҳаракатларни тезроқ тўхтатиш ва можарони тинч йўл билан ҳал этиш»га чақирувлар келтирилган.

2022 йил 24 февралдан бери БМТ Бош ассамблеяси Россия—Украина можаросига бағишланган Фавқулодда махсус сессия йиғилишларини бир неча бор ўтказган. Бугунга қадар Украинани қўллаб-қувватлаш бўйича олтита резолюция қабул қилинган. АҚШ Буюк Британия, Франция, Германия, Полша, Эстония, Латвия, Литва ва бошқа Ғарб давлатлари билан ушбу ҳужжатларнинг ҳаммуаллифи ҳисобланади.

Аввалроқ Трампнинг Украина президентини «диктатор» деган даъвоси Бирлашган Миллатлар Ташкилотида кескин танқидларга сабаб бўлганди. Германия канцлери Америка етакчисининг сўзларини нотўғри ва хавфли деб атаган.

#Украина #БМТ #резолюция