Италиялик журналистлар жосуслик дастури сабаб ҳукумат устидан прокуратурага шикоят қилди

Италия миллий журналистлар федерацияси (FIEG) мамлакат ҳукуматига нисбатан жиноят иши очишни талаб қилиб, Рим прокуратурасига шикоят киритди. Журналистлар касаба уюшмалари Италия ҳукумати ҳамда парламентини журналистлар ва ҳукумат танқидчиларига қарши Graphite жосуслик дастуридан фойдаланиш ҳақидаги сўровларига жавоб беришдан бош тортганликда айбламоқда.

Январ ойида Италия ОАВ мамлакат махсус хизматлари телефонларига Graphite ўрнатилган одамлар орасида суриштирувлар билан шуғулланувчи журналист Франческо Канчеллато ҳам борлиги ҳақида хабар берганди. Кейинроқ The Guardian ўз манбаларига таяниб Исроилнинг Paragon компанияси (Graphite’ни яратган) Италия ҳукумати дастурий таъминотдан фойдаланиш қоидаларини бузгани учун у билан шартномани бекор қилгани ҳақида ёзди. Парламент махсус хизматлари ўз фаолияти давомида дастурий таъминотдан фойдаланганини тан олган, бироқ журналистлар кузатувга олинганини рад этган.

Аммо FIEG бунга шубҳа билан қарамоқда. «Франческо Канчеллато ўзига нисбатан ушбу дастур қўлланган Италиядаги ягона журналист бўлганми? Ўйлашимизча, йўқ. Биз аниқлик хоҳлаймиз, биз журналистлар ўз ишини хавотирсиз бажаришларини истаймиз», — дейди касаба уюшмалари бош котиби Алессандра Константе.

FIEG жосуслик дастурий таъминотидан қайси идоралар ва қандай ҳолатларда фойдаланиши мумкинлигига оид маълумотлар очиқланишини талаб қилмоқда.