ЕК раҳбари Европани қайта қуроллантириш режасини тақдим этишга ваъда берди

Еврокомиссия раиси Урсула фон дер Ляйен Европа давлатларини қайта қуроллантиришга чақирди ва яқин кунларда бу бўйича тегишли режани тақдим этишга ваъда берди. Сиёсатчи ушбу таклифни Украина бўйича Лондонда ўтказилган саммитдан кейин маълум қилди.

У Европа давлатлари етакчилари билан ўтказилган музокараларни «яхши ва очиқ мунозара», деб атади. Фон дер Ляйеннинг сўзларига кўра, Украинага ўз иқтисодиёти ва армиясини қўллаб-қувватлаш учун «кенг қамровли хавфсизлик кафолати» керак.

«Биз зудлик билан Европани қайта қуроллантиришимиз лозим. Узоқ даврдан бери етарлича инвестиция киритилмаганидан кейин энди узоқ муддатга мудофаа учун сармояни ошириш жуда муҳим. Европа Иттифоқи хавфсизлиги учун бу керак. Ҳозир яшаётган геостратегик муҳитимизда биз энг ёмонига тайёр бўлишимиз ва шунинг учун мудофаани кучайтиришимиз керак».

Урсула фон дер Ляйен мудофаа харажатларини ошириш учун солиқ сиёсати ҳам ўзгариши мумкинлиги ҳақида гапирди. «ЕИ давлатлар мудофаа харажатларини кескин ошириш учун кенгроқ фиксал майдонга муҳтож», — дейди у. Еврокомиссия раисининг сўзларига кўра, 6 март куни Брюсселда ўтказиладиган ЕИ саммитида бу борадаги тегишли режа тақдим этилади.

Шунингдек, фон дер Ляйен АҚШ билан диалог борасидаги саволга ҳам жавоб қайтарди: «Биз биргаликда демократия ва ҳужум қилиш, қўшнингни қўрқитиш ва чегарани куч билан ўзгартириш мумкин бўлмаган қонун устуворлиги принципларини ҳимоя қилишга тайёрмиз».