Сербияда мухолифат парламент йиғилишида тутун чиқарадиган шашкаларни улоқтирди. Уч депутат жароҳат олди

Мухолифат вакиллари парламент йиғилишини тўхтатиш учун тартибсизлик уюштирди. Оқибатда уч нафар аёл депутат жароҳат олди — улардан бирининг саккиз ойлик ҳомиласи бор.

Фото: Видеодан кадр

Белградда Сербия парламенти йиғилишида мухолифат депутатлари тартибсизлик уюштирди, деб хабар беради Danas нашри.

Қайд этилишича, 4 март куни мухолифат вакиллари депутатлар томонидан кун тартибининг қабул қилинишига норозилик билдириб, мажлисни тўхтатишга уринган. Улар спикер Ана Брнабич олдига бораётганида қўриқчилар томонидан тўхтатилган.

Бунга жавобан мухолифат «Сербия тузумни ағдариш учун қўзғалмоқда» деган баннерларни ёйган ва тутун ҳосил қиладиган шашкаларни улоқтирган.

Спикернинг сўзларига кўра, тартибсизликлар оқибатида уч нафар аёл депутат жароҳат олган: Ясмина Обрадович, Ясмина Каранец ва Саня Илич. Обрадович инсултни бошдан ўтказган. Ҳозирда тиббиёт ходимлари унинг ҳаёти учун курашмоқда. Каранец бошидан жароҳат олган. Учинчи жабрланувчининг саккиз ойлик ҳомиласи бор.

Сербияда 2024 йил кузидан бери норозилик намойишлари давом этмоқда, бунга Нови-Саддаги марказий вокзалнинг янги таъмирдан чиқарилган биносида бетон соябон қулаб тушгани сабаб бўлган. Ҳодиса оқибатида 15 киши ҳалок бўлган эди.

Фожиали воқеадан кўп ўтмай Белградда норозилик намойишлари бошланди, вақт ўтиши билан улар Сербиянинг бошқа шаҳарларига ҳам тарқалди. Уларнинг иштирокчилари айбдорларнинг жазодан қутулиб қолишига йўл қўймасликка чақирди. Намойишчилар Нови-Сад мэри ва мамлакат бош вазири Милош Вучевичнинг истеъфосини талаб қилди.