Гуржистон парламенти «Чет эл агентлари» тўғрисидаги иккинчи қонунни маъқуллади

Ҳукмрон «Гуржистон орзуси» (ГО) партиясидан аъзоларни ўз ичига олган Гуржистон парламенти 1938 йилда қабул қилинган АҚШнинг хорижий агентларни рўйхатга олиш тўғрисидаги қонуни таржимаси бўлган қонун лойиҳасини маъқуллади. Бу ҳақда 4 март, сешанба куни Гуржистоннинг Tabula портали хабар берди.

Унга кўра, қонун лойиҳаси биринчи ўқишда қабул қилинди. Ҳукмрон партиядан 84 депутат ёқлаб овоз берди. Ҳеч ким қарши чиқмади. Октябр ойидаги сайловларни сохталаштирилган деб ҳисоблаган мухолифат парламент ишини бойкот қилмоқда.

Жисмоний шахслар ҳам «чет эл агенти» сифатида тан олиниши мумкин

«Гуржистон орзуси» депутати ва парламентнинг ҳуқуқ қўмитаси раҳбари Арчил Гордуладзенинг айтишича, Гуржистоннинг хорижий агентларни рўйхатга олиш тўғрисидаги янги қонуни «Америка қонунининг батафсил таржимаси». Унинг эслатишича, «Чет эл таъсирининг шаффофлиги тўғрисида»ги қонун Гуржистонда 2024 йил ёзида кучга кирган. Оммавий ахборот воситалари уни аллақачон «чет эл агентлари қонуни» деб атаган. У оммавий норозиликларга қарамай маъқулланди.

Янги қонуннинг фарқи шундаки, у оддий фуқароларга ҳам таъсир қилиши мумкин. «Агар амалдаги «Ошкоралик тўғрисидаги қонун» фақат нодавлат ташкилотлар, онлайн ОАВ ва телерадиокомпанияларга тегишли бўлса, Америка қонуни жисмоний шахсларга ҳам таъсир қилади. Жисмоний шахс ҳам хорижий куч, ҳам агент бўлиши мумкин», — дея Гордуладзе сўзларини келтиради Гуржистоннинг Netgazeti портали.

Tbilisi life Telegram-каналининг қўшимча қилишича, «хорижий агентлар» тўғрисидаги биринчи қонун қабул қилингандан сўнг кўпчилик нодавлат нотижорат ташкилотлари давлат реестрида рўйхатдан ўтишдан бош тортган. «Энди улар FARA асосидаги янги қонунни жорий қилмоқда, у рўйхатдан ўтишдан бош тортган тақдирда жиноий жавобгарликни назарда тутади», — деб ёзади портал.