Reuters: Трамп маъмурияти 240 минг украиналик қочоқни ҳуқуқий мақомидан маҳрум этишни режалаштирмоқда

АҚШ президенти Доналд Трамп маъмурияти 2022 йилдан кейин келган 240 мингга яқин украиналик қочоқни ҳуқуқий мақомидан маҳрум қилишни режалаштирмоқда. Бу ҳақда Reuters агентлиги ўз манбаларига таяниб хабар берди.

Маълумотларга кўра, бу борадаги қарор апрел ойида қабул қилиниши кутиляпти ва у украиналиклар депортациясини тезлаштиришга олиб келиши мумкин.

Украиналик қочоқлар учун мўлжалланган дастурнинг бекор қилиниши Трамп ва Зеленский ўртасидаги тортишувдан олдинроқ бошланган эди. Reuters манбалари Трамп маъмуриятининг ушбу қадамини Жо Байден даврида вақтинчалик бошпана тақдим этиш бўйича гуманитар дастурлар доирасида мамлакатга келган 1,8 миллионга яқин мигрантни ҳуқуқий мақомдан маҳрум қилиш ташаббусининг бир қисми деб атамоқда.

Мазкур ташаббус доирасида Трамп маъмурияти, шунингдек, март ойидан 530 минг кубалик, ҳаитилик, никарагуалик ва венесуэлаликка гуманитар ёрдам кўрсатишни бекор қилишни режалаштирган.

АҚШ Ички хавфсизлик вазирлиги матбуот котиби Триша Маклафлин идора бу борада ҳеч қандай изоҳ бермаслигини маълум қилди. Оқ уй ва Украина элчихонаси агентлик сўровларига жавоб қайтармаган.