Франция разведкасининг собиқ бошлиғи миллиардер Бернар Арнога ёрдам бергани учун тўрт йилга қамалди

У LVMH ҳолдинги ва Бернар Арнони танқид қилиб келган газета ҳамда унинг журналистини кузатиш билан шуғулланган.

Фото: Reuters

Париж суди Франция Марказий ички разведка бошқармасининг собиқ бошлиғи Бернар Скуарсинига ҳукм чиқарди. У LVMH ҳолдинги ва унинг раҳбари миллиардер Бернар Арно манфаатлари учун давлат маблағларидан фойдаланганликда айбдор деб топилди.

Reutersʼнинг ёзишича, бундан ташқари, Бернар Скуарсини фаол, ҳозирда парламентарий Франсуа Рюффенни ноқонуний кузатувга олганликда ҳам айбдор деб топилган.

Шундай қилиб суд собиқ разведка бошлиғи LVMH томонидан ҳолдинг ва шахсан Арнони танқид қилган Рюффен ҳамда Fakir газетасини кузатиш учун ёллангани ҳақидаги прокуратура айбловини тасдиқлади. Кузатувга Fakir журналистлари томонидан ҳолдингнинг Франциядаги фабрикалари ёпилиши тўғрисида «Раҳмат, хўжайин!» сатирик филмига тайёргарлик кўрилаётгани сабаб бўлган.

Бернар Скуарсини тўрт йил муддатга қамоқ жазосига ҳукм этилди ва 100 минг евро жаримага тортилди. Унинг адвокати ҳукмни олқишлаб, фақат судланувчилар ўриндиғида Арнонинг ўзи ҳам йўқлигидан афсусда эканини билдирди.

Бернар Арно дунёдаги энг бадавлат инсонлардан бири бўлиб, суд жараёнида гувоҳ сифатида иштирок этган: Louis Vuitton Moët Hennessy (LVMH) таъқибни тўхтатиш эвазига 10 миллион евро тўлаб, тергов билан келишувга эришган. Келишувда Арнонинг ўз айбига иқрор бўлиши кўрсатилмаган.