Олмаотада эркак пичоқ билан аэропорт ходимига ташланди. Уни танишини кузатгани келган шахс зарарсизлантирди

Эркак хавфсизлик ходимлари ҳужжатларини сўраганида, пичоқ билан ташланиб қолган ва инспектор аёлни гаровга олган. Қозоғистон президенти уни қўлга олишда ёрдам берган фуқарони мукофотлашни буюрди.

Фото: Видеодан кадр

Қозоғистоннинг Олмаота авиация хавфсизлиги хизмати ходимига пичоқ билан ташланиб қолган эркак қўлга олинди, деб хабар беради Orda.kz.

Қайд этилишича, воқеа 7 март куни эрталаб парвоздан олдинги текширув ҳудудида содир бўлган. Нашр маълумотларига кўра, авиация хавфсизлиги ходимлари эркакдан ҳужжатларини сўраганида, у ўзини «тажовузкорона тутиб, пичоқ билан ҳужум қилган».

Эркак инспектор аёлга ташланиб, унинг сочларидан тортган ва пичоқ билан таҳдид қилган.

Аэропорт матбуот хизмати аввалига эркак орадан етти дақиқа ўтгач ҳаво бандаргоҳи ҳудудидаги полиция бўлинмаси ходимлари томонидан зарарсизлантирилганини маълум қилди. Ҳужум қилган эркак қўлга олинган ва транспорт полицияси бўлинмасига олиб кетилган.

Кейинроқ эркакни қўлга олишда аэропортдаги ташриф буюрувчилардан бири — танишини рейсга кузатишга келган 52 ёшли Мусо Абдураим ҳам иштирок этгани маълум бўлди. Нашрга кўра, у инспектор аёл ўрнига ўзини гаровга таклиф қилган.

«Абдураим ўйлаб ўтирмасдан ўзини гаровга олишни таклиф қилди, кейин эса у билан олишиб кетди: пичоқни тутиб олиб, ҳужум қилган шахсни зарарсизлантирди, кейин эса эркакни полга ётқизди», — дейилади хабарда. Шундан кейин полиция ва аэропорт хавфсизлик хизмати ходимлари етиб келган.

Қозоғистон президенти Қосим-Жўмарт Тўқаев Абдураимни мукофотлашни буюрди.