Зеленский: Россия ўт очишни тўхтатишдан бош тортса, Украинани мустаҳкамлаш керак бўлади

Украина президенти Володимир Зеленский Россияни АҚШнинг Киев ва Москва ўртасида 30 кунлик ўт очишни тўхтатиш ҳақидаги таклифига жавоб беришга чақирди. «Ҳаммаси Россия ўт очишни тўхтатиш ва тинчланишни хоҳлайдими ёки одамларни ўлдиришда давом этишни хоҳлайдими, бунга боғлиқ», деди у 12 март, чоршанба куни Киевда.

Аввалроқ Украина 30 кунлик оташкесимга рози бўлган, энди эса Москва ўз жавобини бериши керак, деди Зеленский.

Россия ўт очишни тўхтатишдан бош тортса, АҚШ Украинани кучайтиришга мажбур бўлади

Украина президенти агар Россия ўт очишни тўхтатишдан бош тортса, Вашингтондан «кучли» муносабат кутишини қўшимча қилди. «Ҳозирча тафсилотларни билмайман, лекин биз санкциялар ва Украинани мустаҳкамлаш ҳақида гапиряпмиз», — дея тушунтирди у. Зеленский ҳамон Москвага «ишонмаслигини» айтди.

Бундан ташқари, Володимир Зеленский Украина иттифоқчилари билан 30 кунлик оташкесим кучга кирганидан кейин ўз мамлакати учун хавфсизлик кафолатларини муҳокама қилишга ваъда берди.

Украина: АҚШ ҳарбий ёрдамни тиклади

Жиддада Украинадаги урушни тўхтатиш имконияти бўйича музокаралар якунида Киев Вашингтоннинг агар Россия рози бўлса, 30 кунлик оташкесим ўрнатиш ҳақидаги таклифини қабул қилишга тайёрлигини билдирганидан сўнг, Қўшма Штатлар мамлакатга ҳарбий ёрдам етказиб беришни қайта бошлади. Бу ҳақда Facebook ижтимоий тармоғида 12 мартга ўтар кечаси Украина президенти девони раҳбари ўринбосари Павел Палиса хабар берди.

«Қўшма Штатлардан хавфсизлик бўйича ёрдам тикланганини тасдиқлайман. Келишувлар амалга оширила бошланди. Жанг давом этмоқда!» — деб ёзган у.

CNN телеканали ҳам ўз веб-сайтида исмини ошкор этмаган украиналик амалдорга таяниб, Американинг Украинага ёрдам етказиши қайта бошлангани ҳақида хабар берди. «Сешанба куни (11 март) украиналик амалдор Американинг Украинага хавфсизлик бўйича ёрдами қайта бошланганини тасдиқлади», — дейилади нашрда.

Аввалроқ Жиддадаги музокаралар якунлари бўйича Украинанинг ўт очишни тўхтатиш бўйича келишувига жавобан АҚШ вакиллари Киевга ёрдам зудлик билан тикланишини эълон қилган эди. Бундан ташқари, Қўшма Штатлар Украина билан разведка маълумотларини алмашишга дарҳол қайтишга ваъда берди.