Бокс 2028 йилда Олимпиада дастурига қайтиши мумкин

Халқаро олимпия қўмитаси (ХОҚ) Ижро кенгаши янги бошқарув органи (World Boxing) яратилганидан сўнг боксни 2028 йилги Лос-Анжелес Олимпиадасига қайтаришни истамоқда.

The Independent ёзганидек, бокс ҳозир Лос-Анжелесдаги Олимпиада дастурига расман киритилмаган, жумладан, олдинги бошқарув органи (IBA) атрофидаги жанжаллар ва гендер тести билан боғлиқ можаролар туфайли.

Россия бошчилигидаги Халқаро бокс ассоциацияси (IBA) 2019 йилда спортнинг бошқарув органи сифатидаги фаолияти тўхтатилган эди. Қарор бир қатор бошқарув, молиявий, суд-ҳуқуқ ва ахлоқий муаммолар туфайли қабул қилинган. 2023 йил июнь ойида IBA ислоҳотларни амалга оширмагани сабабли ХОҚ томонидан тан олиниши ҳақидаги мақомидан маҳрум қилинган.

IBA мақоми пасайтирилгандан сўнг, бокснинг янги жаҳон бошқарув органини яратиш кун тартибига айланди. Бу 78 аъзони ўз ичига олган World Boxing ташкилотининг яратилишига олиб келди.

World Boxing ўтган ойда ХОҚ томонидан халқаро бошқарув органи сифатида вақтинчалик эътироф этилган бўлса-да, қўмита ижро кенгаши аллақачон боксни Олимпия ўйинлари дастурига киритишни тавсия қилган.

Ижро кенгаши таклифини маъқуллаш бўйича овоз бериш жараёни шу ҳафта бўлиб ўтади. Агар улар «ҳа» деб овоз берса, бокс 2028 йилги Лос-Анжелес ўйинларининг бир қисми бўлади ва унинг Олимпия мақоми тикланади.