Британия разведкаси: Россия армиясининг Украинадаги йўқотишлари 900 минг кишига етди

Британия разведкаси маълумотларига кўра, 2022 йилда Украинага қарши уруш бошланганидан бери Россия армияси ҳалок бўлган ва яраланганлар билан бирга қарийб 900 минг кишини йўқотган бўлиши мумкин. Бу ҳақда Буюк Британия Мудофаа вазирлиги ҳисоботида сўз боради.

Лондоннинг баҳолашича, ҳалок бўлган россиялик ҳарбий хизматчилар сони 200-250 мингни ташкил этади — бу Россия учун Иккинчи жаҳон урушидан бери энг катта йўқотишдир.

Разведканинг қайд этишича, Россия раҳбарияти, жумладан, Владимир Путин ҳам уруш мақсадларини ўз аскарлари ҳаётидан устун қўяди: Кремл юқори даражадаги йўқотишларга кўникишга тайёр, агар бу урушга нисбатан аҳоли ва элитанинг қўллаб-қувватлашини заифлаштирмаса ҳамда бу йўқотишларни қоплаш имконияти сақланса. Таъкидланишича, РФ ҳукумати қашшоқ минтақалардаги этник озчилик вакилларининг ҳаётига камроқ аҳамият беради. Натижада, айнан шу ҳудудлардан келган аскарлар сафарбарликка номутаносиб равишда кўпроқ жалб қилинмоқда.

«Москва ва Санкт-Петербург каби шаҳарлардаги славян миллатига мансуб россияликлар сафарбарликка анча кам жалб қилинган. Аксинча, этник озчилик вакиллари бўлган қашшоқ ҳудудлардаги аҳолининг улуши анча юқори», — дейилади ҳисоботда.

Пентагоннинг 2024 йил ноябрдаги маълумотларига кўра, Россия армиясининг жами қурбонлари ва яраланганлари сони 615 минг кишини ташкил этган. Ўшанда Британия Мудофаа вазирлиги Россиянинг умумий йўқотишларини 610 минг кишига (200 минг киши ҳалок бўлган, 400 минг аскар яраланган) баҳолаганди. 2024 йил июнда Владимир Путин урушнинг 27 ойи давомида Россия 135 мингга яқин ҳарбийсидан айрилганини маълум қилган эди.

Феврал охирларида BBC рус хизмати «Медиазона» билан биргаликда уруш бошланганидан бери ҳалок бўлган 95 минг 26 нафар россиялик аскар ва офицерларнинг шахсини аниқлашга муваффақ бўлган. 24 январдан 21 февралга қадар ушбу рўйхатга яна 5007 киши қўшилган. Шунингдек, журналистлар ДХР ва ЛХРдаги қуролли тузилмаларнинг 21 мингдан 23,5 минг нафаргача ҳарбийси ҳалок бўлганини ҳисоблаган. Гап асосан мажбурий сафарбар этилган ва минимал тайёргарлик билан фронтга жўнатилганлар ўлими ҳақида кетмоқда.